AHATA: Uni cartera di turismo y asuntonan economico bek

ORANJESTAD - AHATA durante e reunion cu gobierno diahuebs, a presenta proposicionnan concreto referente e caso di all inclusive. Segun AHATA,  nan ta comparti preocupacion di e mandatario tocante e bienestar y progreso di e industria turistico y ta di acuerdo cu por tuma cierto pasonan pa proteha, mehora y regula e industria aki miho cu locual tabata e caso den pasado. Y basa riba e reunion recien di 19 di mei, a pidi AHATA pa trece proposicionan concreto, cual nan a haci diahuebs.  

PROPOSICION

Como parti di e proposicion, AHATA ta sugeri pa uni bek e dos Ministerionan di Asuntonan Economico y Turismo bou di Señor Minister su guia y responsabilidad. Y nan tin e motivacion pa tal tambe. Segun AHATA, ta un echo bon conoci ,- y e mandatario di turismo mes a trece esaki repetidamente padilanti-, cu e economia di nos isla ta depende fuertemente riba turismo. Pa tal rason mes, segun AHATA, historicamente tabata e caso cu administracion di nos turismo y nos economia a keda consolida den man di e mesun ehecutivo; un diputado prome cu aña 1986 y un minister despues. Ta absolutamente logico pa tin e dos responsabilidadnan aki hunto cerca e mesun ehecutivo.   

BENEFICIO

AHATA ta sinti cu como minister di asuntonan economico, lo ta den competencia di Minister Oduber e ora pa establece maneho y liñanan di guia pa e permitnan di negoshi (vestigingsvergunning) cu ta emiti di conformidad cu e Ordenansa tocante Permit (Vestigingsverordering Bedrijven). Mas specificamente, Minister di Asuntonan Economico por dirigi e Director di Asuntonan Economico pa inclui limitacionnan specifico den e permitnan di negoshinan respecto e obhetivo (doelstelling) pa cual un negoshi por establece y funciona, tal como restriccionnan riba e cantidad di tempo cu por huur un apartamento residencial of condominio cu turistanan. 

ESTABLECE REGLANAN

E Minister di Asuntonan Economico tambe por establece cu di awor padilanti ta rekeri su aprobacion prome cu otorga cualkier permit di negoshi relaciona cu e industria di turismo (incluyendo, por ehempel, restaurantnan, barnan y nightclubs)  y lo mester ta di conformidad cu e maneho y liñanan di guia cu lo fiha pa sirbi interes di Aruba. Lo mester formula e maneho/norma y liñanan di guia nobo den consulta estrecho cu tur stakeholders, manera AHATA, ATIA, AGA, the CoC, SNBA, ATSA, e sindicatonan, etc. Lesa e proposicion completo aki.