Hospital ta cuestiona reclamo di DVG di caso recien

ORANJESTAD - Den representacion di directiva di hospital Horacio Oduber, actual director Ezzard Cilié diahuebs atardi a desmenti informacionnan suministra recientemente pa minister di salud Alex Schwengle duna na NoticiaCla.com un siman y mei atras. E mandatario na e ocasion ey a referi na e poder cu directie volksgezondheid (DVG) pa haci control y adkeri informacion ora ta necesario. Aki e tabata referi na e caso di un mama y yiu cu a muri durante parto. DVG a yama e situacion un calamidad, cual conotacion tambe Cilié a desmenti. Y ta pa evita tipo di situacionan fastioso di (falta) di comunicacion, Cilié a splica diahuebs cu ta bon pa tin sessionan frecuente cu (entre otro) prensa pa splica kico por y no por (bisa). 

NO TA DUNA INFORMACION 

Ora cu e situacion (cu DVG a conota como calamidad) a presenta, NoticiaCla.com a busca contacto cu hospital mesora pero a haya como contesta cu no ta papia awor. "Nos ta papia na su debido tempo. Ora cu nos ta cla" Cilié a bisa na tal ocasion. En cambio, tanto for di DVG como minister di salud si NoticiaCla.com a haya reaccion. Y ta riba e reaccion aki primordialmente Cilié a reacciona diahuebs pa mustra nan banda di medaya y asina kita tur mal informacion/comprendemento cu por tin. 

MEDIDA SERIO ORA VIOLA PRIVACIDAD DI PASHENT

Cilié a recorda cu hospital den su funcion huridicamente no por bin afo y duna informacion sin mas. De hecho pa ley nan ta prohibi pa papia riba pashent y nan situacion. A mustra cu trahadonan di hospital ta huramenta pa mantene informacion di pashent como algo priva, y si esey no wordo respeta, ta tuma medida drastico contra esey. Pa demonstra e seriedad, a menciona un caso cu algun trahado a wordo kita 'op staande voet' ora cu nan a comparti informacion priva di un pashent. Y den caso di trahadonan contractual cu no ta huramenta, nan tin esaki regla den un contracto. 

UZO DI PALABRA CALAMIDAD

E tema tabata 'calamidad' y si e uzo tabata corecto of no durante e encuentro entre Cilié y prensa. Cilié a referi na un carta cu el a ricibi di DVG cu ta cuestiona e hecho cu hospital lo a faya pa raporta e 'calamidad' aki. Algo cu Cilié a mustra cu no tabata necesario. A haci un investigacion y a resulta cu e loke a sosode, no tabata un calamidad. "Ni segun definicion Hulandes" Cilié a bisa. "Na kico DVG ta referi, nos no por (a) saca afor" Cilié a sigui bisa. Mes momento e director di hospital a atende su posibel diferencia di opinion cu e mandatario y a mustra cu 'mi lo no discuti diferencia di opinion cu minister publicamente'. Den mesun rosea, Cilié a mustra cu e forma con e mandatario a expresa su mes den e articulo di NoticiaCla.com, no ta corecto. "Den e articulo manera cu e ta poni, e ta fuera di su contexto. Y casi mi lo bisa cu no ta berdad" Cilié a bisa. E ta compronde si con e por a wordo bisa asina, pero e situacion no tabata asina.