Minister: Confirma cu HOH a nenga di duna inspectie informacion

ORANJESTAD - E hecho cu directiva di Horacio Oduber Hospital a nenga di duna informacion na departamento di salud, no ta nada nobo. De hecho, segun minister di salud Alex Schwengle a bisa NoticiaCla.com, e no ta nada nobo el a sosode den pasado caba. Den e caso ultimo tabata riba e.o. e situacion real di virus cu tabatin den hospital cu a conduci cu pashentnan a wordo manda den experior. Ora cu dept di salud a pidi pa informacion, hospital a nenga di haci tal. E tempo ey, NoticiaCla.com a puntra e directiva pa reaccion, pero a opta pa warda cu esey. Te ainda HOH no a reacciona. 

MOTIBO CU HOSPITAL A NENGA DI DUNA INFORMACION

Minister ta bisa cu segun hospital, a nenga di duna e informacion, pasobra tabatin hopi informacion 'priva' di e pashent(nan) y nan tin obligacion pa defende e privacidad. Aki e mandatario a mustra cu hospital ta lubida cu inspectie tin hopi derecho pa mira aden, dependiendo e caso. "Door cu nunca a sinta manera hende grandi na mesa yega na un bon comunicatie beleid conhuntamente, cada bes bo ta keda haya discusion innecesario manera esaki" Schwengle a sigui bisa. Mes momento, e mandatario ta cauteloso cu su contestanan mirando cu e no sa exactamente kico e preguntanan tabata cu a wordo haci na hospital. Pero e mandatario a sigura cu ta yegando na un solucion entre hospital y inspectie. Tambe e mandatario ta mustra cu no ta cu hospital no kier a coopera sino mas bien no tabata 'full duidelijk' kico tabata nan derecho. 

INSPECTIE TIN PODER HOPI FUERTE

Mientrastanto e mandatario si a reacciona riba e asunto pa NoticiaCla.com. Segun e mandatario, sa pasa mas biaha cu tin discusion riba ki tipo di informacion ta duna otro, y hopi biaha ta trata di e departamento di inspectie di salud y hospital. "Ta lubida hopi biaha cu inspectie tin un poder hopi fuerte" e mandatario a sigura NoticiaCla.com. Ora cu nan kier drenta un instancia di zorg y busca informacion, bo no mag di nenga nan (e informacion)" e mandatario a sigui bisa. Mes momento e mandatario ta bisa si cu ta bon semper si pa esun cu duna e informacion, pa double check si enberdad e informacion cu e ta bay duna inspectie, ta esun corecto y si e mag di duna tur informacion. 

NO DUNA INFORMACION NO TA UN PROBLEMA GRANDI

E hecho cu hospital ta nenga of a nenga di duna informacion no ta un problema asina grandi segun e mandatario pasobra manera e mes ta bisa 'het komt wel goed'(tur cos lo ta ok). Loke sinembargo e asunto aki ta ilustra segun e mandatario, ta cu tin algo structuralmente no bon den e maneho di comunicacion. E mandatario a confirma cu a papia esaki den grupo, y cu lo bin un reunion pa formula un maneho di comunicacion entre hospital y inspectie, pasobra e ta bay ta necesario. E ta un di e temanan importante pa e 'inspectie nobo'. E ora mester ta bon cla pa nan kico ta tur e derecho di tur partido.