Gobierno riba nivel 'halto' tin te 30 di juni pa resolve problema di Barcadera

ORANJESTAD - Por lo pronto no tin ningun accion na e waf di Barcadera, por lo menos segun ATIA y e sindicato di douane esta SADA. Tanto presidente di e gremio, Michel Henriquez y e presidente di sindicato Eduard Maduro a confirma na NoticiaCla.com cu te cu 30 di juni lo no tin ningun 'issue'. Di parti di ATIA, Henriquez a bisa cu no lo entama ningun caso sumario, y di parti di SADA, Maduro a sigura cu no tin ningun accion. Di parti di ASTEC, nan a priminti cu no lo haci 'fastioso' cu e control te e fecha ey. 

CASO SUMARIO VS ACCION

Awe mainta Henriquez a bisa NoticiaCla.com cu a laga e caso sumario pendiente cay, pasobra 'no tabatin sinti' pa haci'e mas mirando cu no tin menasa di accion mas. Di parti di SADA, a mustra cu nan a haya palabracion di nan minister (Angel Bermudez) cu partidonan 'ta papiando' cu otro y cu entre nan na nivel halto lo resolve e asunto. A duna partidonan te 30 di juni proximo pa keda cla cu e asunto aki y como tal por lo pronto partidonan a keda satisfecho.