ATIA cu caso sumario contra SADA pa stop welga na Barcadera

ORANJESTAD - E gremio comercial mas grandi di Aruba, esta Aruba Trade and Industry Association (ATIA) a cuminsa caso contra SADA pa stop welga na Barcadera. No ta conoci ki ora e caso lo tuma lugar. ATIA representando comercio a tuma nota di e situacion na waf di Barcadera unda Douane a pone trabow abou y consecuentemente cera e cranchi di nos economia den protesta tocante di regla di seguridad.

SITUACION DIAHUEBS

Diahuebs ultimo ASTEC y SADA a purba di sali for di nan diferencia di opinion tocante e reglanan di seguridad pa subi tereno di waf na Barcadera segun normanan internacional di ISPS manera supervisa door di DSA (Directie Scheepvaart Aruba) y APA. Lamentablemente esaki no a yega na un solucion. ATIA den interes di comercio di Aruba ta respeta derecho di tur organisacion, pero no por ta asina cu ta cera entrada di producto pa un diferencia di opinion.

DEPENDENCIA DI IMPORTACION

Aruba ta depende pa mas cu 95% di importacion di producto for di exterior y un accion asina ta perhudica comercio y Aruba en general. Un daño incalculabel ta wordo haci na nos economia y Aruba, mientras cu mester tin otro manera pa soluciona e situacion aki na mesa sin yega na un accion asina dañino pa nos pais.

CASO DEN CORTE

ATIA ta lamenta cu e situacion aki a bay for di man y mester a yega na un caso den corte. ATIA representando comercio mester sali na vanguardia di comercio y ta spera cu asina por para e daño enorme cu e accion aki ta causando.