Discusion riba e futuro di All-Inclusive a sigui domina

ORANJESTAD - E debate publico, politico  y comercial riba e situacion di All inclusive na Aruba a continua e dianan aki y fin di siman. Di tur banda instancianan relevante na e topico ta bringando di nan banda, sea pro of contra, pa asina purba convence nan respectivo contrincante cu nan tin rason. Di un banda, gobierno ta mustra cu mester regula e situacion pa 'salba' Aruba di un fenomeno cu por resulta funesto pa nos turismo/economia. Di otro banda e sector hotelero, representa primordialmente pa e asosacion hotelero AHATA (Aruba Hotel & Tourism Association) ta insisti cu gobierno no por unilateralmente cambia curso di un patronchi cu a funciona y cu ta Aruba su 'bida' economico. Y entre nan, tur sorto di comentario di gremio y instancia cu kier mustra nan preocupacion. E fraccion di oposicion (MEP) te hasta a reuni cu AHATA pa pone nan mes na altura di e situacion eynan. Y mientrastanto e comunidad tin cu asimila tur e informacion aki miho posibel. 

COMENTARIONAN

E fin di siman aki e racha di articulo, aviso y comentario a sigui domina e rednan cybernetico y social, cu e unico meta di profila nan mensahe. Uno mas fuerte cu otro, y uno purbando di ta mas convincente cu otro. Manera cu un persona a comenta e fin di siman aki ',Ta parce cu e desacuerdo actual no necesariamente ta trata e topico di 'all inclusive', sino mas bien dos asunto. 1. Si e definicion di un persona su licencia/permit por wordo altera literalmente pa gobierno despues cu esaki tabata den operacion caba y 2. E cantidad di poder/control cu e ley nobo lo duna un minister.' Y asina tin mas comentario cu a circula e fin di siman aki. 

MAS CONFUSION ENVEZ DI CLARIDAD

Manera cu NoticiaCla.com a relata caba den un articulo anterior, varios banda a vocifera nan opinion den comunicadonan extenso. Y cada bes un di e comunicadonan aparece, e respectivo contrincantenan ta responde y contra aresta esaki fervientemente. Y ora cu esaki sosode, e ta crea hopi biaha aun mas confusion en bes di claridad.

KVK VS GOBIERNO

Ora cu Camara di Comercio a sali afo den un comunicado cu nan reaccion cu nan ta cuestiona e forma con gobierno ta atendiendo e situacion, unda cu entre otro ta cuestiona e falta di investigacion, transparencia y e posibilidad pa un minister regula un situacion asina grandi di turismo, e mandatario a bin bek mesora. Segun e mandatario, 'esaki ta e mesun Camara di Comercio cu un aña pasa tabatin un vision completamente diferente', tildando e gremio di ta 'flip flop'. Camara di Comercio di su banda a reacciona mesora indicando cu nan no ta considera cu nan a 'flip flop', sino mas bien debi cu nan a haya mas informacion durante aña, nan punto di bista a keda ahusta. Tanto Gobierno como camara di comercio a confirma cu e di tres siman di mei, nan lo topa cu otro. 

AHATA VS GOBIERNO

Porta esun cu mas hopi ta visibel ta e 'confrontacion' entre gobierno (lesa minister di turismo Otmar Oduber) y AHATA (lesa CEO Jim Hepple). AHATA den varios articulo extenso y aviso grandi, a mustra na desaprobacion total pa cu e intencion di e mandatario. Indicando for di un principio cu nan ta representa e sector turistico di Aruba, e mandatario di turismo a bin bek informa cu ta 'apenas' 28 miembro nan ta representa di cual mayoria ta hotelnan di Aruba pues no tur hende. AHATA a contesta bek cu nan ta representa mas di 80 miembro di tur area di turismo. Un biaha mas, gobierno ta bin bek cu carta di miembronan cu lo a informa e mandatario 'distancia' nan mes di AHATA su ponencia cu nan ta wordo representa pa e asociacion hotelero. NoticiaCla.com a pone su man riba varios di e documentonan di ambos banda. Entre nan, cartanan di minister pa doñonan hotelero, splicando nan e intencion di gobierno y purbando di laga nan mira e situacion cu gobierno kier logra. Tambe NoticiaCla.com a pone su man riba e rapport di PWC cu tin cu mustra kico e efecto ta di e situacion di mas of menos all inclusive na Aruba. Na su debido tempo lo presenta esaki tambe.  Mientrastanto,  ambos, tanto gobierno como AHATA a confirma cu nan mas probablemente lo topa otro proximamente den corte pa debati e topico aki.