Ta spera gobierno bataya legal pa cambia 'all-inclusive'

ORANJESTAD - Gobierno ta cla pa un confrontacion cu ken cu kier bring'e den su intento pa frusta e cambio di ley riba e asunto di 'all inclusive'. Den un reaccion na NoticiaCla.com, minister di turismo Otmar Oduber a bisa cu e ta cla pa bay corte cu e.o. AHATA, argumentando cu 'gobierno ta bringa pa interes general' mientras cu AHATA ta 'bringa pa derecho di su 28 miembronan'. E hecho cu e colegio mas halto di conseho (Raad van Advies) su conseho di 4 pagina ta uno totalmente negativo riba e concepto di e ley en cuestion tampoco ta stroba e mandatario. "Nos ta respet'e (e conseho), pero nos ta carga nos responsabilidad" e mandatario a bisa. 

CAMBIO DI LEY

Manera ta conoci, gobierno a presenta un modificacion di un ley existente cu ya a yega parlamento y mester wordo trata un di e dianan aki. Segun e mandatario, ta necesario pa e modificacion aki bin pa e.o. tin un siguransa cu no por tin mas companianan cu por djis yega y comberti hotelnan regular den uno all-inclusive. E modificacion di e ley ta den tapara pa 2 aña caba, y awor ta cla pa wordo presenta pa votamente. Pero e ley ta confrontando hopi resistencia, primordialmente pa AHATA (e organo cu ta representa nos sector di turismo) y e conseho negativo di Raad van Advies. Ambos,-pa medio di nan respectivo cartanan-, a desconseha pa e ley aki wordo trata. Den caso di AHATA nan a te hasta bisa cu lo no basila pa hiba gobierno corte pa frenta e intento di e cambio aki. 

E CARTA DI AHATA

AHATA den un carta di 4 pagina ta mustra cu nan ta 'totalmente oponi pa e cambionan proponi unda cu un permiso di hotel ta wordo unilateralmente cambia'. Segun e gremio, e modificacion di ley ta 'viola e principio di mercado liber cu a goberna e manera cu e sector turistico a opera y cu ta genera 90% di e entrada di e isla, pa no papia di e cantidad di empleo cu e ta genera'. "AHATA como tal, ta totalmente contra pa cualkier cambio den e regulacion di e permiso pa hotel, y ta totalmente oponi pa cualkier restriccion cu por perhudica e manera di opera y mercadea e hotelnan". Ademas e gremio ta mustra cu e cambio di ley aki lo 'basicamente duna e mandatario di turismo e poder pa impone restriccion riba e abilidad di e hotelnan pa reacciona riba un mercado cu ta cambia". Ademas e gremio ta preocupa cu e ley manera proponi, lo resulta den un 'colapso di confiansa di inversionistanan'.

REACCION RIBA AHATA

Oduber, conciente di e preocupacion di AHATA, no ta ria sinembargo pa e presion y si tin cu bay corte, ta bay corte. E mandatario ta basa su mes riba conseho experto internacional cu a mustra cu esaki ta e miho forma pa anda. Segun Oduber, AHATA ta solamente 'parcialmente' contra, y e mandatario ta compronde e preocupacion di e gremio hotelero. A mustra tambe riba e menasa actual di dos compania internacional cu ta cla pa tuma dos hotel over na Aruba y comberti nan tambe den un tipo all-inclusive. Mientras cu e mandatario no kier a bisa NoticiaCla.com cua e companianan aki ta, el a bisa si cu Holiday Inn ta un di hotelnan cu a haya oferta pa conberti su propiedad den uno all- inclusive. Segun e mandatario, si permiti esakinan di tuma over, ta mas di 50% di tur camber di hotel na Aruba traduci na 1400 camber di hotel extra lo ta parti di e concepto di all- inclusive. Algo cu e no por permiti. E mandatario a probecha pa recorda con a 'rescata' e actual Hilton Hotel di bira un otro hotel Riu aña pasa na e periodo aki, ora cu na ultimo ora ,-mientras cu un otro compania tabata den pleno negosacion-, RIU kier a cumpra e ex Radisson hotel. Na final Aruba Growth Fund a logra toch pa tuma e hotel (ex Radisson) y convirtie den loke awe ta Hilton Aruba Caribbean Resort. Den caso di RIU, e cadena Spaño a splica NoticiaCla.com recientemente cu pa awor, nan no tin interes pa otro propiedad pero den futuro no ta descarta e posibilidad y por ta interesa den areanan otro cu e parti di Palm Beach. 

RAAD VAN ADVIES

Pero los di e sector hotelero, e parti legal ta uno cu porta ta mucho mas importante. NoticiaCla.com a compronde cu Hulanda ta hopi interesa den e asunto aki, mirando e embergadura y precedente cu e asunto aki por crea. Entre otro, si tuma nota di e loke cu e organo di consulta a trece den su rapport di 4 pagina. Esaki pasobra segun RvA, gobierno en bes di traha un ley nobo, kier modifica un ley di permiso existente (vergunningsverordening AB 2002, GT 1m). Como tal kier uza un ley pa legalisa algo otro, siendo cu e ley cu kier uza, no ta traha pa esey. Pues ta abusando di un instrumento asina. A compronde cu esey ta e punto cu Hulanda tin wowo ariba y di eynan e interes pa e desaroyo aki. Raad van Advies no a laga ningun duda y a practicamente destrui e ley aki y na final a sugeri pa Gobernador 'no presenta e ley aki na parlamento'. Fuera di cu gobierno kier uza un ley existente pa modifica esaki den un otro ley, esaki no ta motiva, y tambe no a pidi e conseho di e.o. Sociaal Economisch Raad. A meramente basa su mes riba e interes di parlamento cu a bin cu un mocion aña pasa unda cu gobierno a basa su mes totalmente riba esaki. A sali for di e punto di bista cu si e comision central di turismo a bay di acuerdo cu e plan di gobierno, cu no mester di un estudio adicional pa hustifica e cambio di ley aki. 'Gobierno no por tuma un mocion di parlamento 'klakkeloos' (sin pensa) y converti esaki den un ley sin e estudio necesario pa hustifica e ley. 

ODUBER RIBA RAAD VAN ADVIES

Riba e conseho negativo di Raad van Advies, Oduber a mustra NoticiaCla.com cu en berdad a tuma nota di e conseho extenso y analisis di e organo di consulta. "Pero at the end, nos ta respeta esaki, pero ta nos tin cu carga e responsabilidad y e consecuencianan". A tuma 80% di e ley den consideracion pa loke ta e parti 'wettechnisch'. E critica cu Oduber tabatin riba Raad van Advies, ta cu segun e mandatario, 'ta bisa kico no por segun nan', pero 'no ta bisa kico pa haci'. Di otro banda, NoticiaCla.com a nota cu den varios parti ta mustra ki rumbo gobierno mester tuma pa por haci e ley aki uno corecto. Aki e ta mustra p.e. cu pa e ley funciona, mester tin mas rapport, y mester comberti e ley den uno apart y no 'adapta' e 'vergunningsverordening' den algo cu no por ta y cu por bira un precedente peligroso.