Corte: Garage Centraal a comete fraude pretendiendo di representa Porsche

ORANJESTAD - Garage Central mester paga un ex cliente e suma completo bek cu e cliente a paga pa su auto, pasobra e agencia a pretende di ta e agencia licencia pa e marca di e auto sin cu e tabatin e permiso pa haci tal. E caso e por wordo considera como uno 'inusual' cu lo crea hurisprudencia pa futuro casonan di e tipo aki. E hecho cu e cliente ta e conocido comerciante Rene Kan, y e auto ta un porsche, no ta haci e storia menos interesante ni cambi'e, sino mas bien ta mustra cu un agencia di auto na Aruba den futuro no por sigui 'tuma clientenan haci' sin mas. E caso mes a tuma lugar dos luna pasa den corte di prome instancia na Aruba. 

SENTENCIA 

Den e sentencia diaranson mainta, hues a duna Kan tur loke el a pidi p'e, esta destrui e contracto entre Kan y e agencia di auto, paga Kan e suma di AFL  171.913.90 incluyendo e interes acumula for di dia di e sentencia, y e agencia mester paga e gastonan di e caso tambe. Kan tabata contento cu e sentencia y a splica Noticiacla.com cu esaki ta habri porta pa tur hende cu a yega di cumpra un porsche, un audi y mas probabel hasta un volkswagen, pa hiba nan auto bek Garage Centraal y pidi nan placa bek". Esaki pasobra segun e comerciante, fuera di Porsche, ta parce cu e agencia no ta representa e otro marcanan menciona tampoco. Notabel ta e uzo di terminologia den e sentencia, unda cu hues ta uza e palabra den Hulandes 'kunstgreep' pa mustra e practica di comete actonan fraudulento. Den e caso aki, pa pone un persona drenta den e creencia cu e ta cumprando un auto di cierto marca cerca un agencia cu no tin e autorisacion pa haci tal. Lesa e sentencia aki.