Agencia di auto demanda pa a representa ‘Porsche’ ilegal

ORANJESTAD – Ora un hende cumpra un auto, -Porsche den e caso aki-, cerca un dealer di auto e regla relevante ta cu e ta haci esaki cerca un dealer di berdad. “No por tin un discusion serio riba e caso aki”. Asina abogado Rogier van den Heuvel a argumenta pa su cliente den corte diaranson merdia. E cliente, -conocido comerciante local Rene Kan-, a demanda e agencia di auto Garage Central y GTI di a comete fraude pa a pretende di ta e dealer di auto autorisa pa e marca Porsche, siendo cu nunca nan no tabata autorisa. Mientras cu e solucion den e caso aki ta pa e agencia di auto reembols’e e placa cu el a paga pa e auto, Kan su meta principal tabata pa mustra cu e abuso di car dealernan na Aruba tin cu stop. “Pa esun cu no por paga un abogado ora cu dealernan purba manipula e cliente, mi ta bringando e caso aki awe” Kan a bisa den corte y tambe despues pafo cerca NoticiaCla.com.

AGENCIA NO POR A DRECHA E AUTO

E caso ta data for di 2014 ora cu ,-despues di a cumpra e auto dos aña prome-, Kan a raporta cu e auto tabatin un fayo tecnico pa cual el a hiba e auto pa e agencia pa nan drech’e. Un dia despues cu Kan a haya su auto bek, -un Porsche Cayenne SUV-, e problemanan a cuminsa. A resulta cu e agencia no por a resolve e problema. Ta ora cu Kan a yama e compania na Merca (Porsche Latin America) pa ayudo, a bin resulta cu e Porsche di Kan no tabata registra oficialmente den nan sistema. Esey tabata notabel pasobra e problema di e auto por tabata sea un di dos cos, ya cu e problemanan ey ta conoci cu e tipo di autonan aki. “ Sea ta problema cu e tire, of e ‘transfer case”. Pero e hecho cu e agencia local no a deal cu Porsche mes, nan no por tabata sa di esaki, y como tal no por a soluciona e problema tampoco.

PORSCHE NO CONOCE E AGENCIA NA ARUBA

Kan a presenta un carta den corte, procedente di Porsche cu ta confirma cu e compania oficial (Porsche) no conoce e agencia na Aruba (Garage Central/GTI), y como tal no ta reconoce e agencia como un dealer oficial di Porsche. “Nos tabatin ningun contacto cu ningun di e partidonan den e mercado aki, y no ta na altura di ningun partnership di servicio cu e compania GTI Aruba”, e carta di e compania a bisa. Ora cu Kan a reclama e agencia, en bes di acepta nan fayo nan a bay den defensa argumentando cu ‘Nos tabata representa Porsche durante e tempo cu bo a cumpra bo Porsche, pero mirando cu e negoshi aki no tabata rendabel, nos a stop di importa Porsche pa Aruba’.

AGENCIA TA ADMITI CU NO TA DEALER

Durante e caso dado momento e abogado di e agencia local di auto esta Rick Samuels a acepta y admiti cu su cliente porta no tabata un dealer pa Porsche, pero cu nan a haci tur posibel pa remedia e situacion. “Pa loke ta e argumentonan presenta, nos ta diferencia (cu Kan) seriamente di pensamento. De hecho a purba mustra cu Garage Central no tabata partido den e caso aki sino GTI Aruba. Segun Samuels, Kan a probecha y core dushi pa 30 luna largo, y despues di daña e auto, kier causa problema.

A OFRECE PA DRECHA E AUTO

Ademas, segun e agencia su abogado, a ofrece pa drecha e auto pa un prijs special, y tambe cumpra e auto bek, pero contra e balor cu e auto tabatin e momento ey, esta 2 aña bieu. Algo cu Kan a rechasa.

HUES TA CUESTIONA AGENCIA RIBA NAN DEFENSA

Hues dado momento a cuestiona e defensa di e agencia, puntrando si nan ta compronde e esencia di e defensa di Kan. Segun e hues, e enfoke di e agencia tabata e.o. riba e fayo di auto y e detayenan di con a purba yuda drech’e, mientras cu nan no a trata e esencia mes esta e hecho cu nan a pretende di ta un agencia autorisa di e marca di auto Porsche, siendo cu esaki no ta e caso. “Ora cu un persona bin un agencia grandi manera di boso y mira un logo grandi di cualkier compania, e mester por asumi cu e ta deal cu un dealer autorisa. Si e haya un logo asina cerca un agencia ‘bou palo’, esey lo ta otro. Pero no cerca un agencia grandi manera di boso” Hues a sigui bisa. “Bo ta sugeri cu sr Kan mester bay cuestiona boso dealership cada bes e kier cumpra un auto eynan?” e hues a sigui puntra.

PAKICO KAN A CUMPRA E AUTO

Kan a haya chens pa hiba palabra, y a mustra cu ta riba peticion di e salesman di e agencia Tony Hartman, a dicidi di cumpra e auto pa su casa. Segun Kan, (a cita e declaracion textualmente), e representante di e agencia a bisa Kan cu el a tuma nota cu su casa lo ta un bon persona pa core den e auto ey, hibando su yiunan scol y otro caminda. Y coriendo un auto asina lo ta un bon propaganda pa e compania. Y e hecho cu e agencia awor a bira e dealer di Porsche, esaki lo no ta un problema pa regla. “Mi a cumpra e auto pa e motibo ey. E auto otro di mi casa tabata masha bon” Kan a bisa.

KAN TA COMERCIANTE CONOCI

E abogado di agencia e ora a bay tras di Kan personalmente, mustrando cu si tabata trata di cualkier otro persona, esaki lo no a bin dilanti. Pero pasobra ta trata di Kan, siendo un comerciante conoci na Aruba y cu ta conoci di a cumpra varios auto den exterior, e lo mester tabatin conocemento di kico por y kico no. Pues, pasobra e ta un persona conoci, e caso a haya un tinte asina. Di otro forma nunca un caso asina lo a bin dilanti. De hecho, e doño di e compania a mustra tambe cu “pa aña nos ta bende 1000 auto. Nunca e clientenan no tabatin problema. Awor Kan ta cumpra un auto y tin problema. Algo no ta bon. Nos a purba di yuda Kan di tur forma, pero e no tabata kier”, propietario di e compania Garage Central, Mich Biegstraaten, a bisa ora cu e mes por a hiba palabra den corte.

DEFENSA CUESTIONABEL

Kan a mustra cu e ta considera e defensa di e contra partido hopi cuestionabel, mirando cu ta sconde tras su relacionnan comercial como comerciante, cu nan a comete fraude y pone trampa pa hende cay aden.

AGENCIA DI AUTO: NUNCA A ACTUA DI MALA FE

Finalmente e abogado di e contra partido (e agencia di auto) a sigura cu nunca nan a actua di mala fe y nan tabatin palabracion concreto cu e dealer di Porsche na Corsou. Como tal, asina nan por a trece ‘tur cos in-house’ pa bende autonan di Porsche. Kan a reitera atrobe cu e motibo di e caso no ta pa e placa, sino mas bien pa manda un señal pa cualkier agencia di auto cu kier purba di actua di mala fe cu un cliente door di por ehempel manipula nan, cu nan tin cu pensa dos biaha awor. “E cliente normalmente no tin e placa pa paga un abogado pa defende un tipo di caso asina. E grandinan ta probecha riba esey. Ami kier cambia esey y manda e señal diferente. P'esey mi a haci e caso aki”, Kan a bisa na final. Hues na final a puntra e abogado di e agencia si e ta bay di acuerdo pa paga Kan e placa cu Kan a paga pa e auto (ora di compra) pa soluciona e problema ya cu segun hues ‘esey lo ta e unico solucion awor toch”. E doño di e agencia riba esey a contesta, ‘Nos no ta acepta esey”. Hues a cera e caso y ta dicta sentencia dia 13 di april proximo.