Gregory Elias riba morto di Prince: 'Un momento y dia hopi tristo pa musica'

WILLEMSTAD - "E ta un momento y dia hopi tristo pa musica". Asina Gregory Elias, filantropo, organisador y forsa responsabel pa Curacao North Sea Jazz Festival a reaciona diahuebs atardi pa NoticiaCla.com riba e morto sorpresivo di e artista Prince. Elias tin memorianan special di Prince ya cu e ta esun cu a trece Corsou na 2013, como reemplaso di otro bon artista Usher cu a cancela pa motibonan personal e tempo ey. "E tabata un innovador, el a supera tur genero. Un berdadero genio inspirador a laga nos" Elias a sigui bisa, notablemente tristo cu e noticia cu a shock e mundo di farandula riba tereno internacional. "Mi por pensa solamente riba "When doves Cry". Elias ta considera esaki como un di su cancionan 'monumental'. "Well nos tur ta yorando aworaki" Elias a sigui bisa. 

CONCIERTO NA 2013

Tabata na 2013 ora cu Elias a haya su mes den un situacion fastioso ora cu diripiente, cu miles di carchi bendi caba, e artista principal pa e aña ey (2013) a cancela abruptamente pa motibonan personal. A opta e ora pa un reemplaso y a haya nada menos cu Prince. Hopi no a gusta, otronan a dicidi di no busca nan placa bek y a keda cu esaki pa Prince mes. Y esnan cu a opta pa keda y bay e concierto di Prince, no a keda desapunta. De hecho, esnan cu tabata privilegia, a experiencia locual Elias mes ta considera un di e miho conciertonan di e serie di festival for di aña cu e la cuminsa na 2010. De hecho, tabata apenas algun siman atras cu den un entrevista pa NoticiaCla.com mes, Elias a splica e posibilidadnan pa por a trece Prince Corsou atrobe e aña aki, mirando cu tabatin un demanda grandi p'e. E reaccion no tabata mucho positivo, ya cu hopi a bisa cu con cu ta, Prince mester tabata bek, cu piano su so of no. Prince ta Prince. 

RECORDANDO PRINCE

Un colega periodista di Corsou Jeroen Jansen a resumi esaki bon riba su pagina di Facebook. E ta admiti cu e no ta un fanatico di Prince, pero a crece cu su musica. Ta ora cu el a bishita e concierto, el a siña conoce Prince y a bira un fanatico for di e momento ey. Y asina tin hopi mas cu awe ta recorda nan momentonan cu nan a disfruta di e concierto. Mes hopi ta esnan cu no a bay e concierto ey y cu awe ta lamenta esaki grandemente. Varios di nan ta na Aruba y cu awe ta desea di por a presencia e concierto di 3 ora largo na 2013. 

MENSAHE PA PRINCE

Bek pa reaccion di Elias, e ta laga un mensahe atras pa Prince. "Prince, cu bo haya felicidad y amor aya ariba cu e Dios y e angelnan. Nan mester ta contento pasobra bo ta aya ariba cu nan, compartiendo bo musicalidad maravilloso". NOTA. Foto di Prince den concierto na 2013 na Corsou, cortesia Bea Moedt