Elias: Prince kier bolbe CNSJ pero solamente pa toca 'solo' cu su piano

WILLEMSTAD - Sea e siman aki of otro siman e organisadornan di Curacao North Sea Jazz Festival ta anuncia dos nomber adicional pa e line up pa e edicion number 7. "Mi ta spera cu e siman aki mi tin un of dos nomber nobo" e organisador di e evento pa Corsou, Gregory Elias a confirma na NoticiaCla.com e siman aki. "Nos ta biniendo cla cu poco nomber hopi bunita. Si no ta e siman aki, ta otro siman sigur" e filantropo a sigui bisa. "Esunan cu nos tin den tapara ainda, bo tin 7 nomber mas, mi ta kere cu nan lo cay na agrado di hopi hende" Elias a sigui bisa. "Nos ta full swing cu ne". Pa loke ta e formato, Elias a sigura cu ta djies e nombernan ta cambia. "Formula ta keda mescos" Elias a sigui bisa. 

INTERES PA PRINCE RIPITI

Basa riba e hecho cu tin un demanda grandi pa e artista Prince presenta atrobe, a puntra Elias kico e posibilidadnan ta. "Nos a papia cu ne, e la bisa 'si mi kier bin, pero mi kier bin solo". Esey ta nifica cu e kier bin su so cu su piano. "Mi a bis'e cu pami ta un honor. Nos ta butabo den un sala chikito cu yama Celia cu tin 4 pa 5000 hende pa wak bo y bo por toca piano 2 ora y mey" Elias a bisa. Pero e interes pa Prince ta mas bien pa e bin full force pa e haci tur su cosnan cu el a haci 3 aña pasa. "Kiermen e aña aki e no ta bin".

LINE UP PA 216

Teniendo cuenta cu falta 7 artista ainda pa wordo menciona, recientemente e organisadornan a anuncia e nombernan nobo pa e di 7 edicion, cu ta tuma luga riba 1, 2 y 3 di september. Grandinan manera Tom Jones, Jamie Cullum, Level 42, Branford Marsalis & Kurt Elling y Melody Gardot lo t'ey riba nos isla riba diabierna. Pa diasabra nos tin te ainda Michael Bolton y Snarky Puppy. Special pa e festival aki, productor Sergio George a forma Our Cuban Affair. Un proyecto unico pa por brinda e publico lo mehor di musica Cubano. Cu Havana D’Primera di Alexander Abreu como base, y lo tin un elenco di cantante manera: Aymee Nuviola, Isaac Delgado, Paulito FG y tambe e vacalistanan di Los Van Van. Un concierto historico pa cuminsa nos festival riba stage Sam Cooke diabierna anochi. E organisacion ta trahando duro riba otro nombernan di diferente artista. Nos lo anuncia esakinan den lunanan cu ta bini.