Gomez: Corte a duna Elmar razon riba asunto di no work no pay

ORANJESTAD – Pa gerencia di Elmar, nan ta contento cu e sentencia dicta awe mainta den e caso cu nan a entama contra e sindicatonan UEA y Alvast. Contrario na pensamento di e abogado di e partido contrario David Kock, abogado Dello Gomez ta mustra NoticiaCla.com cu ‘corte a duna Elmar rason, esta cu 'no work no pay' ta valido’. Pa loke ta e otro punto di Kock, unda cu hues ta mustra cu no por prohibi e trahadonan pa bay welga, esey no ta un problema pa Gomez. Segun Gomez, e hecho cu e trahadonan a priminti caba cu no ta bay sigui welga, a pone cu hues no a mira rason pa duna Elmar un punto aki, pasobra e no a bira relevante mas.

HUES A DUNA ELMAR RASON

Mas aun, ora cu segun Gomez, hues a duna Elmar rason caba cu nan a cana e caminda corecto riba e punto di 'no work no pay'. Dado caso den futuro e trahadonan bay welga riba e punto ey, hues segun Gomez, a laga e porta habri pa entama un caso sumario pa para e accion ey dado momento. Pero pa awor, e trahadonan a priminti caba cu no ta bay welga mas. Y esey tabata e meta di e compania for di comienso. Como tal, e ta satisfecho. Segun Gomez, for di e orde maatregel, a logra loke nan tabata busca, esta pa e trahadonan reanuda trabou. Pero mirando cu no tabatin garantia cu e lo a continua, a procede cu e caso diabierna.

NO POR PARA UN WELGA CU NO TA SIGUI

“Hues no por para un welga cu lo no sigui” Gomez a argumenta, bisando cu esey tabata e pensamento tras di e decision di hues, pa no duna Elmar rason riba peticion pa prohibi welga, pasobra esey no tin sentido. Loke tambe a toca ta e hecho cu ta welga pa algo, djey cambia na caminda pa otro motibo, cu sigur no ta posibel. Aki ta referi na e hecho cu a cuminsa e welga pa problema di sistema ‘nobo’ di seguridad, pa despues welga pa asunto di 'no work no pay'. Lesa e sentencia aki.