Corte: Elmar no por para trahadonan di tene accion

ORANJESTAD – Elmar no por prohibi sindicato UEA y e trahadonan pa tene welga of accion colectivo. Asina e sentencia a dicta segun abogado di UEA David Kock na NoticiaCla.com awe mainta. Manera a anticipa, awe mainta hues mester a dicta un sentencia, unda cu a resulta cu hues enberdad a mustra Elmar cu no por prohibi trahadonan di bay den accion. Pa loke ta e parti di ‘no work no pay’, Kock a mustra cu otro luna lo determina kico Elmar lo haci. Si no paga e dia cu a welga siman pasa, lo por tin un tipo di accion, cu e sindicato no ta descarta. Pero segun Kock, e enfoke den e sentencia no tabata riba e 'no work no pay', sino si e trahadonan por welga mas den futuro.

PROHIBI PA WELGA

Segun Kock den e caso ultimo di siman pasa, Elmar a persisti pa hues dicta riba e parti di un prohibicion di welga, pa evita un interumpcion di e operacion di e compania. Algo cu hues segun Kock, no a permiti. A forsa UEA di bringa riba e caso ey den e caso ya cu Elmar a persisti. Ademas segun Kock, e hecho cu ta prohibi welga, ta contra constitucion y tambe tratado internacional. Ora papia di welga, no ta papia solamente di para pafo, sino di bisti p.e na luto como protesta of cualkier otro tipo di accion. “Riba e punto ey hues a duna nos rason y a rechasa e peticion di Elmar awe” Kock a sigui bisa.

NO WORK NO PAY

Den e caso di 'no work pay', por pas toe un 'no work no pay', behalve si partionan a conveni algo otro. Den pasado segun Kock, Elmar semper a paga e oranan di un accion. “Pero esey no tabata e disputa aworaki, sino Elmar ta sinti cu e mester por prohibi hende pa nan bay keha” Kock a bisa. E salario en cuestion ta wordo paga (of no) te otro luna. “Porta Elmar ta bedenk su mes y ta pensa of evalua, cu miho paga e oranan. Pero no por evita di antemano prohibi sindicato den un derecho asina sagrado colectivo (di protesta)” Kock a sigui bisa. Ta keda na Elmar si ta paga e trahadonan pa e oranan cu nan a welga. “Sindicato a anuncia caba cu si Elmar ta persisti den esey (no paga), nan lo wak kico e pasonan ta cu nan lo tuma. Y hues a bisa awe cu den esey bo no por prohibi nan”. Lesa e sentencia aki.