SMAC: Declaracion Alto Comisario no ta berdad

ORANJESTAD – Ningun momento gruponan a pidi SMAC cambio di horario diamars ultimo, y ningun momento SMAC a nenga pa haci esaki. “Absolutamente cu no” ta palabra di presidente di SMAC Randy Thiel durante e programa NoticiaCla Merdia. Thiel a reacciona riba e ponencianan di alto comisario di polis Dolfi Richardson, y a desmenti categoricamente cu e informacion(nan) cu a keda suministra, no ta corecto. “Ora cu mi a puntra sr Richardson unda el a haya e informacion, el a contesta cu esey ta e informacion cu el a haya” Thiel a bisa. Pues aki cos ta bolbe bolter mirando cu SMAC a tira tur cos den scochi di polis. A mustra cu lo reuni cu polis y tur otro stakeholder otro siman diamars awor pa mira unda cosnan ta wordo bisa cu no ta corecto. “Y si resulta cu mi ta robes, mi lo pidi despensa publicamente. Pero si no ta asina, lo mi bisa esey tambe” Thiel a bisa.

SMAC NO TA ORGANISA

Un otro acusacion cu Thiel a refuta, ta cu segun e alto comisario, SMAC no ta bon organisa pasobra no sa cuanto hende ta bin den su parada. “Ningun caminda ta para cu gruponan no por bin cu mas hende” Thiel a bisa, pues e argumento ey no ta cuadra tampoco segun Thiel.

VERSION ORIGINAL DI SMAC

Tabata dialuna atardi prome cu e presidente di SMAC Randy Thiel a splica NoticiaCla.com su version di kico a pasa e fin di siman cu a pasa. Segun Thiel, tabata KPA cu no kier a cambia e orario di parada na Playa diadomingo, cu a pone cu e gruponan ultimo a yega Vondellaan den scuridad. Presidente di SMAC Randy Thiel a confirma na NoticiaCla.com cu despues di a experencia e situacion di diasabra na San Nicolas (mas hende a participa cu originalmente a registra), a pidi polis pa cambia e orario di diadomingo pa cuminsa mas tempran. “Lamentablemente nos a bin tende di KPA cu no por a cumpli pa cambi’e (e orario) diadomingo ” Thiel a bisa NoticiaCla.com. Di parti di polis, Lito Lacle a mustra cu minister di husticia Arthur Dowers lo reacciona riba e parti di polis, pakico nan no por a cambia e orario manera cu SMAC a pidi.

CARNAVAL MAS CHIKITO

Segun Thiel, ora cu a papia aña pasa cu stakeholders, a bin tuma nota cu e carnaval e aña aki lo tabata bay ta mucho mas chikito cu normal. “E ora a dicidi pa cambia e ora pa 1’or, pa no tin cu sali 11’or y yega final 3’or (di atardi)” Thiel a bisa. Pa sorpresa a bin resulta diasabra cu tabatin un carnaval grandisimo na San Nicolas, y no tabatin forma pa bisa cu no tin carnaval 1’or. “E mesun anochi ora cu e gruponan a yega laat na San Nicolas, di biaha mi persona a acerca cuerpo policial na nomber di gruponan di carnaval pa toch purba hala e orario di diadomingo pa 12’or. Y ayera un biaha mas, mas tabata e sorpresa ora e carnaval a resulta di ta mas grandi cu esun di San Nicolas. “Dus eynan bo ta mira cu no tabata den nos man pa pone 1’or sino hunto cu e gruponan di aña pasa a purba cambi’e orario mirando cu e lo a bira mas chikito” Thiel a bisa. Pero polis no tabata por a cambia e orario.

SORPRESA DI POLIS

Pa sorpresa di Thiel, mando policial den nomber di Dolfi Richardson a manda un comunicado dialuna anochi laat (lesa e articulo aki) , contradiciendo su palabranan y bayendo liña recta cu loke el a bisa. Como tal a opta pa reacciona diamars merdia na radio durante e noticiero NoticiaCla Merdia na Power FM 101.7FM.