Gruponan a pidi pa cambia orario pero SMAC a nenga

ORANJESTAD - For di diamars gruponan a pidi pa cambia orario, pero SMAC no tabata kier! Asina hefe maximo di polis Dolfi Richardson a reacciona den un comunicado. E ta asina contradeci e comentario di e presidente di SMAC, Randy Thiel haci na NoticiaCla.com, unda cu Thiel a bisa cu ta polis no tabata kier a cambia e orario ora cu a haci e peticion diasabra anochi. Segun Richardson, cos ta diferente di loke cu Thiel a bisa. E culpa ta cay, segun Richardson riba SMAC y no riba polis."

TAREA DI POLIS Y ESUN DI SMAC

Mester ta cla pa tur hende cu organisacion di carnaval no ta den man di Cuerpo Policial Aruba, sino den man di SMAC. Nos tarea primordial ta pa mantencion di orden publico y nada mas” Richardson a sigui bisa den e comunicado. “Responsabilidad di cada ken ta bon fiha den e protocol cu Polis y SMAC a firma", Richardson a sigui bisa, como reaccion riba e declaracionnan haci pa Presidente di SMAC.

NO TA ACEPTA CU TA BENTA FAYO RIBA POLIS

"Organisa un evento manera carnaval no ta facil. Den esey ta rekeri hopi tempo, hopi inversion, pero tambe hopi conocemento y experencia pa por hinca un draaiboek den otro cu ta cana perfectamente", di acuerdo cu e hefe di e organisacion Policial. Y ta despues di un evento asina por midi e nivel di organisacion y e exito su tras of e erornan cometi. "Pero pa awor bin purba benta e fayo riba Polis mi no ta acepta!"

SMAC A GARANTISA SOSTEN DI GRUPONAN

Mando Policial ta aclaria cu for di principio caba SMAC hunto cu su miembronan a dicidi di cambia e ruta di carnaval dor di bolter e direccion. Tambe a opta pa cuminsa mas laat en bes di e orario di custumber. SMAC a garantisa cu e tin sosten di tur grupo di carnaval den nan decision, tanto den e ruta como den e orario.

SMAC A NENGA CAMBIA ORARIO

Sinembargo diamars ultimo dia 2 di februari 2016, durante un reunion entre Cuerpo Policial, Gruponan Uni y SMAC, e asunto aki a bini padilanti. Na e ocasion ey Gruponan Uni a vocifera nan preocupacion pa e orario mucho laat y a pidi pa cambi'e pa 10:00 am of pa 11:00 am. Lamentablemente e mesun Presidente di SMAC a nenga, bisando cu e ta mucho riba man.

MUCHO RIBA MAN PA POLIS DIASABRA ANOCHI

Awor, diasabra ultimo pa 8:30 pm despues cu parada di San Nicolas a caba laat, e ora a acerca Cuerpo Policial cu un peticion pa core cambia e orario di e parada grandi di diadomingo. Corectamente Polis a contest'e cu awor si ta riba man pasobra ta como 200 Polis mester yama pa informa nan di e cambio di orario, ta henter un organisacion interno pa cu preparacion, tur cos mester cambia den algun ora di tempo. Riba dje carnaval no ta Polis so, pues mester haya DOW pa ceramento di caminda, IMSan pa ambulancenan, Brandweer, Cuerpo Especial Arubano, Rode Kruis y Serlimar pa menciona algun.

EROR GRAVE DEN ORGANISACION

Polis no por caba di compronde con e cantidad di participantenan den e paradanan di carnaval por a bini di sorpresa pa SMAC, pasobra esey ta nifica cu tin un eror grave den organisacion y den contacto cu mester tin cu Gruponan Uni di carnaval.

INVERSION CUANTIOSO PA ORGANISA EVENTONAN MASAL

Cuerpo Policial Aruba den e ultimo añanan a inverti hopi fondo, hopi recurso den preparacion di su hendenan y den ekiponan necesario pa organisa eventonan masal. Expertonan di Korps Landelijke Politiediensten (KLPD) a bini Aruba na mas di un ocasion pa brinda curso na kader di Polis. Bisando esey, cu hopi orguyo Polis por garantisa cu nan tin e hendenan y e conocemento den organisacion di tipo di eventonan asina.

SMAC NO A CUMPLI CU REKISITO MARA NA PERMISO

"Cu e sucedido di e aña aki, nos lo sinta atrobe cu SMAC pasobra obviamente no a cumpli cu e rekisitonan mara na nan permiso. Y esey ta un asunto grave cu no por ripiti y Polis lo no permiti ripiticion tampoco. Como esunnan encarga cu orden publico, mester evita cu eventonan asina ta caba laat den anochi y ta trece peliger pa e participantenan, pa e mironesnan y pa e Polisnan trahando", segun Alto Comisario Dolfi Richardson.

OVERTIME CUANTIOSO

Y tur esaki, sin cu ta atende e aspecto financiero mes. "Pasobra ningun hende ta puntra nan mes cuanto placa Ministerio di Husticia mester paga na overtime e luna aki pa e tipo di erornan den organisacion asina. E suma ta mucho mas halto di locual mayoria hende lo por imagina", segun Richardson.

POLIS LO NO SINTA MAN CRUZA

Un reunion pa evalua carnaval 2016 lo sigui awor pa repasa punto pa punto kico a bay bon, kico a bay robes y kico por bay miho. Polis no t’ey pa punta dede, pero tampoco lo sinta keto cu man crusa pa tur organisacion cu pretende di por organisa un carnaval, ta sali publicamente culpa Polis pa un evento cu nan mes kier a organisa; a priminti cu nan por; y cu awor a demostra lo contrario!