Evelyn Wever: Spera cu relacionnan cu Merca y Venezuela no wordo afecta

ORANJESTAD – Awor cu e crisis internacional di ex general Hugo Carvajal a caba, lider di MEP Evelyn Wever, ta spera cu por bay bek na orden di dia, cu ta e impasse financiero y constitucional entre Aruba y Hulanda, cu segun Wever, no a caba ainda. Mes momento Wever ta contento cu e crisis internacional ta tras di lomba. “ Mi ta contento cu e conflicto a wordo soluciona y cu sr Carvajal ta bek rumbo Venezuela. Ta di spera cu e relacionnan exterior tanto cu Merca ni Venezuela wordo afecta significantemente cu por afecta nos turismo”

Segun Wever, bek pa e asunto di problema internacional, e ta haya cu nos mester haya hopi mas informacion di kico a pasa exactamente y unda cosnan a bai fout. “ E informacion duna te cu awor en todo caso no ta kita e duda serca e gran mayoria di nos comunidad cu algo a bai bon fout y nos mester sa ken ta responsabel pa e eror ey” Wever a bisa. “ Un eror asina hamas por bolbe ripiti.”

Finalmente, segun Wever, durante e 3 dianan di e conflicto hopi informacion a bin riba mesa cu ta mustra cu integrantenan den gobierno di AVP tin lasonan estrecho directo y\o indirecto cu hendenan cu ta wordo sospecha di participacion na baho mundo. Wever ta referi na e potret cu tabata circula rond unda cu por mira minister Mike de Meza den un reunion cu entre otro Hugo Carvajal (mira foto aki). Segun Wever, mester bin un investigacion urgente riba esaki, especialmente si ta berdad cu placa di narco a wordo uza pa financia campaña politico di AVP!

NoticiaCla durante curso di dia, ya caba a tuma contacto cu minister de Meza anteriormente den dia riba e topico aki, y e la duna un reaccion breve riba e foto, indicando cu tin un splicacion husto pa e potret aki (lesa articulo) y cu e la wordo saca full for di contexto.