Lopez (Cruz Cora Aruba): “Nos ta hiba esperanza na Venezuela y ta representa Aruba cu orguyo”

ORANJESTAD – Cruz Cora Aruba ta cla pa hunga un papel importante den e mision humanitario cu Aruba a lansa rumbo na Venezuela. Esaki a  señora Marylaine Lopez, Coordinador di Desaster Cruz Cora Aruba   a confirma durante un entrevista diadomingo mainta. Segun Lopes, e prome grupo di voluntario cu a sali awe mainta ta consisti di personanan cu a sigui entrenamentonan especialisa y cu ya tin experiencia den respuesta na desastrenan natural. "Cada voluntario cu ta biaha tin su entrenamento y su experiencia. Nos mision awor ta bai brinda sosten, haci un evaluacion riba tereno y trese informacion bek Aruba pa e siguiente equiponan por sali bon prepara," Lopes a splica.

EXPERTONAN DEN RESPUESTA NA DESASTRENAN

E voluntarionan cu a sali ta forma parti di Aruba su Disaster Response Team. Ademas di nan entrenamento den maneho di desastre, den e grupo tin tambe Emergency Medical Technicians (EMT) y Emergency Medical Responders (EMR), profesionalnan certifica cu por brinda asistencia medico inmediato den situacionnan di emergencia. Segun Lopez, e grupo ta sali cu e meta di identifica e necesidadnan mas urgente pa Aruba por manda e tipo di asistencia cu realmente ta haci falta.

PROME GRUPO DI CRUZ CORA FOR DI CARIBE HULANDES

Lopez a revela cu e delegacion di Aruba ta e prome equipo di Cruz Cora for di Caribe Hulandes cu ta viaha pa Venezuela pa participa den e operacion humanitario. "Nos ta ricibi sosten di nos organisacion internacional. Mi ta hopi orguyoso cu mi coleganan a acepta e reto aki. Mi tin confianza cu nan lo haci un trabou excelente y cu, ademas di bandera di Cruz Cora, nan lo hiba bandera di Aruba cu hopi orguyo." Segun e, apesar cu Aruba ta un pais chikito, e contribucion cu e isla ta brinda por haci un gran diferencia pa e pueblo Venezolano. "Talbez nos aporte ta modesto compara cu paisnan grandi, pero pa e personanan cu ta sufri, cada ayuda ta conta. Tambe ta un mensaje importante pa comunidad Venezolano cu ta biba na Aruba."

ENTRENAMENTO CONSTANTE

Lopez a enfatisa cu Cruz Cora Aruba ta dedica hopi atencion na entrenamentu continuo di su voluntarionan. "Nos ta traha dia tras dia pa prepara nos voluntarionan. Nos ta sigui curso, entrenamiento y ehecicion regularmente pa nos por reacciona, no solamente si algo pasa na Aruba, sino tambe den Caribe y, manera awor, incluso pafó di nos region." Segun Lopez, e mision actual ta confirma cu e inversion den preparacion y entrenamiento ta duna resultado.

CRUZ CORA TA INVITA MAS VOLUNTARIO

Despues di e interes grandi cu e mision pa Venezuela a genera, Lopes tambe a invita mas personanan pa uni cu Cruz Cora Aruba. "Nos portanan semper ta habri pa voluntario. Ora un desastre grandi pasa, naturalmente interes ta aumenta. Esnan cu kier contribui por acerca Cruz Cora, bira voluntario y sigui e entrenamentonan necesario. Asina, un dia, nan tambe por forma parti di un equipo cu ta brinda yudansa den situacionnan manera esaki." Segun Lopez, e fuerza di Cruz Cora semper a depende di e compromiso di su voluntarionan, cu ta dispuesto pa sirbi otro den e momentonan cu mas tin necesidad.