Venezuela ta haya apoyo di 24 pais; saldo di e desastre ta subi pa 1.430 morto

ORANJESTAD – Venezuela ta sigui ricibi apoyo grandi for di comunidad internacional despues di e dos fuerte temblornan cu a causa destruccion na diferente region di e pais. Segun informacion cu Consul General di Venezuela na Aruba, Amabel Lugo, a comparti cu Noticiacla diadomingo mainta, un total di 24 pais a uni nan esfuerzo pa yuda den e operacion di emergencia.

Te na e momento aki, e ayudo internacional a inclui 521 tonelada di suministro humanitario, 86 cacho specializa den buskeda y rescate y mas cu 2.741 rescatista, tecnico y personal di apoyo, kende ya ta trahando hunto cu e autoridadnan Venezolano pa atende e emergencia.

Presidente di Asamblea Nacional di Venezuela, Jorge Rodríguez, a informa cu den e ultimo oranan mas pais a yega cu apoyo adicional. Entre nan tin un ekipo di 16 medico for di Corsou, huntu cu rescatistanan y personal medico for di Argentina y Qatar. Puerto Rico a manda rescatistanan y cachonan di buskeda, mientras cu Barbados a contribui cu siete miembro di su fuerza di seguridad.

Segun e ultimo balor oficial, e 21 delegacion internacional cu actualmente ta trahando na Venezuela ta representa un fuerza conjunto di:

2.242 rescatista

96 cacho specializado

40 truck di carga

32 vehiculo di transporte

103,7 tonelada di materialnan, ekipo y herramienta

3 tonelada di medicamento

Na tur esaki ta suma tambe mas cu 30.000 miembro di forza militar, polis, rescatistanan, dokter y paramediconan Venezolano especializado, cu ta participa den e operacionnan di emergencia na diferente parte di e pais.

Mientras tanto, e cifra oficial di victimanan continua subi. Segun e ultimo informe cu tabata disponibel te diasabra atardi, e cifra ta indica cu:

1.430 persona a perde nan bida

3.238 persona a resulta herida

3.142 famia a keda damnifica

Mas cu 12.000 asistencia medico a wordo brinda

73.736 famia a recibi algun forma di apoyo humanitario

Autoridadnan Venezolano a indica cu e cifranan ta provisional y cu un actualisacion nobo lo wordo publica awe, mientras cu rescatistanan local y internacional ta sigui busca sobreviviente y brinda asistencia na e comunidadnan cu mas a wordo afecta.

Consul General Amabel Lugo a expresa su agradecimento na tur e paisnan y organizacionnan cu a mustra solidaridat cu Venezuela durante un di e momentonan mas dificil den historia reciente di e nacion.