Consul di Venezuela na Aruba: “Venezuela ta para, mientras operacion di rescate ta sigui”

ORANJESTAD – Consul General di Venezuela na Aruba, Amabel Lugo, a confirma diahuebs mainta, cu e dos fuerte temblor cu a sacudi Venezuela a pone gran parti di e pais den un estado di emergencia, mientras autoridadnan ta sigui cu operacionnan intensivo di busca y rescate pa localisa sobrevivientenan. Den un entrevista cu Tito Lacle di Noticiacla, Lugo a bisa cu e a haya noticia di e tragedia casi inmediatamente.

E NOTICIA

“Mesora cu esaki a pasa nos a haya e noticia, pasobra nos ta mantene contacto directo cu Venezuela y cu nos autoridadnan. Mi famia ta na Caracas y mesora nos a tende di e terrible noticia.” Segun e consul, dos fuerte temblor a ocuri casi simultaneamente: un di 7.2 y otro di 7.5. “Tabatin dos temblor, un di 7.2 y otro di 7.5 cu a pasa casi na mes momento. Esaki ta un di e motibonan principal p'e desastre a bira asina serio, pasobra e dos temblor tabata demasiado cerca un di otro y e dañonan a wordo bastante grandi den algun estadonan di Venezuela.”

BUSKEDA Y RESCATE TA SIGUI

Lugo a splica cu e prioridad principal awor ta ta busca sobrevivientenan entre e edificionan cu a colapsa. “Awor mes nan ta den labornan di busca y rescate. Tin hopi instalacion y edificio cu a colapsa y actualmente tur esfuerzo ta concentra riba rescata personanan.”

VICE PRESIDENTE RODRIGUEZ

E la bisa cu vicepresidenta Delcy Rodríguez ta sigui informa pueblo regularmente riba e desaroyo di e situacion. “Presidenta encargada Delcy Rodríguez ta sigui duna reportahe tocante e situacion, hunto cu tur mobilisacion di nos rescatistanan y tambe cu e apoyo internacional cu nos ta ricibi pa yuda den e labornan di rescate y salvamento.”

ESTADO DI EMERGENCIA NACIONAL

Gobierno venezolano a declara un estado di emergencia nacional. Segun Lugo, esey ta nifica cu practicamente tur actividad den pais a para temporalmente. “Simplemente a pidi tur ciudadano y residente di Venezuela pa keda den cas. Si no ta necesario sali, no sali. A suspende scol y tur recurso actualmente ta dedica na salbamento y rescate. Tur pais ta para pa e momento aki.”

VENEZOLANONAN NA ARUBA

Te awor, Consulado no a ricibi peticionnan di venezolanonan na Aruba cu tin familiar desapareci of incomunica. “Te na e ora aki nos no a ricibi ningun peticion di algun compatriota na Aruba cu tin un familiar incomunica. No nos tin ningun caso reporta ainda.” No obstante, Lugo a reconoce cu hopi venezolano por kier aporta cu ayudo. “Nos ta comprende cu venezolanonan, no solamente na Aruba pero na tur parti di mundo, tin deseo di yuda. Pero mester spera te ora cu e labornan di rescate termina pa sa exactamente kiko ta haci falta y con e ayudo lo por wordo organiza.”

AGRADECIMENTO NA GOBIERNO DI ARUBA

Durante e entrevista, Lugo a expresa su gratitud na Gobierno di Aruba despues cu Prome Minister Mike Eman a comunica personalmente cu Venezuela. “Nos ta gradici Prome Minister di Aruba pa su yamada hopi tempran mainta, mustrando solidaridad pa tur loke ta pasando y poni su mes na disposicion pa cualkier ayudo cu Venezuela por necesita.” Segun Lugo, e mensahe a wordo transmiti inmediatamente na canciller venezolano Yván Gil. “Mi a comunica esey na canciller Yván Gil, kende tambe a manda su agradecimento na Prome Minister di Aruba y na autoridadnan arubiano pa e apoyo y interes cu nan a demonstra.”

APLICACION SPECIAL PA BUSCA INFORMACION

Lugo tambe a informa cu Venezuela tin un aplicacion oficial pa personanan cu ta busca informacion di familiar of reporta emergencia. “Na Venezuela nos tin un aplicacion cu yama Ven11, unda personanan por manda mensahe pa pregunta pa algun familiar, reporta un edificio cu a colapsa of solicita atencion di e autoridadnan competente.”

AYUDO INTERNACIONAL

E consul a confirma cu e prome ayudo ofreci ta enfoca riba busqueda y rescate. “E prome ayudo ofreci ta principalmente pa busca y rescate. Basa riba experencia cu e terremoto di Haiti, Reino Hulandes a comunica cu den e proximo 24 ora por manda un equipo specialisa den busqueda y rescate.”

FRONTERA SERA TA PRESENTA RETO LOGISTICO

Pregunta riba con ayudo humanitario lo yega Venezuela cu e frontera cu Aruba ta sera, Lugo a bisa cu ainda ta demasiado tempran pa determina esey. “Cu un frontera sera, e tema logistico ta complica bastante. Mi ta pensa cu mester spera prome pa e operacionnan di rescate termina y despues mira con por organiza e transporte di ayudo humanitario si Aruba decide manda asistencia.” “Nos pueblo semper ta lanta den dificultad”

YAMADA PA UNIDAD, FE Y SPERANZA

Como ultimo mensahe na comunidad venezolana, Lugo a haci un yamada pa unidad, fe y speranza. “Manera nos presidenta encargada Delcy Rodríguez a bisa, nos ta pidi solidaridad y hopi oracion den e momento dificil aki. Venezolanonan semper a demonstra cu nan tin hopi resiliencia. Tanto esunnan den Venezuela como esunnan cu ta biba pafor, nos ta sigui dilanti apesar di tur dificultad.” Mientras operacionnan di busca y rescate ta sigui den diferente region di Venezuela, miles di famianan ta sperando noticia di sernan keri, mientras paisnan amigo ta coordina con autoridadnan venezolano pa determina cual ayudo humanitario lo ta mas necesario den e dianan cu ta bini.