BCA: Confiansa di empresarionan ta baha mientras preocupacion pa crecemento ta aumenta

ORANJESTAD – E percepcion di empresarionan tocante e futuro di economia di Aruba a deteriora durante e promer trimestre di 2026. Esaki ta sali na cla for di e mas reciente Encuesta di Percepcion di Negoshi publica pa Banco Central di Aruba (BCA).

Segun e informe, e Business Perception Index a baha cu 3,7 punto di indice te na 104,3. E indice aki ta combina e percepcion di empresarionan tocante e condicion economico actual y nan expectativa pa e futuro cercano.

E deterioro a wordo impulsa principalmente pa un caida den e percepcion di e condicion economico a corto plaso, cu a baha cu 5,6 punto te na 102,4. Tambe e indice di condicion economico actual a registra un descenso di 1,9 punto, cayendo te na 106,0.

E encuesta ta mustra cu empresarionan ta bira mas cauteloso tocante e direccion di economia. E porcentahe di negoshinan cu ta spera un crecemento economico negativo den e siguiente 12 lunanan a subi di manera notable te na 14,3%. Na mes momento, e grupo cu ainda ta anticipa un crecemento positivo a baha te na 42,9%.

A pesar di e preocupacionnan tocante e crecimiento economico, algun indicadornan a sigui mustra señal positivo. Mas di mitar di e negoshinan encuesta, 51,5%, a raporta crecemento den empleo, mientras cu 91% a indica cu nan a registra ganashi durante e promer trimestre di aña.

Ademas, e percepcion di e clima di inversion a mehora. Cerca 39,4% di e empresarionan a indica cu e condicion economico actual pa inversion a mehora, representando un aumento compara cu e trimestre anterior.

Sinembargo, preocupacion tocante inflacion ta keda presente. Mas cu un tercio di e negoshinan consulta, 37,1%, ta spera cu inflacion lo supera 3% den e siguiente 12 lunanan.

E resultadonan ta pinta un cuadro mezcla: mientras actividad comercial y empleo ta sigui mustra resistencia, empresarionan ta menos optimista tocante e ritmo di crecimiento economico pa e aña cu ta bin.