CAft contento cu finansas di Aruba, pero ta alerta pa retraso den inversion y reformanan

ORANJESTAD – Colegio Aruba Financial Supervision (CAft) a confirma cu Aruba a logra un resultado financiero positivo durante prome cuartal di 2026, cu un surplus di financiamiento di AWG 118 miyon. Segun e organismo di supervision financiero, e pais ta cumpli actualmente cu e metanan fiscal estableci y e proporcion di debe publico tambe a baha significativamente.

Den su evaluacion oficial di prome raportahe di ehecucion di 2026, CAft a indica cu Aruba a supera e meta financiero di 1 porshento di Producto Interno Bruto (PIB), alcanzando un surplus equivalente na 1.5 porshento di PIB. Tambe a wordo destaca cu gastonan di personal ta bou di e limite permiti y debe publico a baha te 61 porshento di PIB.

Apesar di e cifranan positivo, CAft a pone enfasis riba varios asunto cu ta causa preocupacion y cu ta requeri accion rapido.

Un di e punto principal menciona den e raportahe ta e retraso den creacion di e fondo di inversion nacional. E fondo tabata suponi di drenta oficialmente den funcionamiento durante prome cuartal di 2026, pero ainda no a wordo formalisa. Segun CAft, e situacion aki ta impedi cu recurso reserva pa inversion wordo utiliza y por pone diferente proyecto planea den peligro.

Organismo di supervision a urgi Gobierno pa establece e fondo liher y pa crea un plan di inversion pa varios aña cu ta coresponde cu prioridadnan nacional y capacidad di ehecucion di Aruba.

CAft tambe a expresa preocupacion tocante finansas di sector colectivo. Aunke Gobierno, AZV, SVb y ATA tur a registra surplusnan financiero, organismo a señala cu sector colectivo ainda no a wordo defini completamente, loke ta haci dificil pa determina cu exactitud e nivel total di debe publico.

Segun e raportahe, AZV a cera prome cuartal cu un surplus di AWG 11 miyon y ta proyecta AWG 72 miyon pa final di aña. SVb a registra AWG 26 miyon surplus y ta spera cera aña cu AWG 62 miyon, mientras cu ATA a logra un surplus di AWG 29 miyon.

Entrada di Gobierno a sigui aumenta durante prome tres luna di 2026, alcanzando AWG 439 miyon, un crecemento di aproximadamente 6 porshento compara cu mes periodo aña pasa. E aumento tabata principalmente gracias na entrada mas halto di impuesto indirecto, impuesto di turismo y otro entrada no fiscal.

Na mes momento, gastonan di Gobierno a subi te AWG 390 miyon, un aumento di AWG 20 miyon. E subida tabata mayormente relaciona cu pagonan adicional di e yamado “reparatietoeslag”. CAft a ripiti su critica cu Aruba ainda no a implementa e test di entrada legalmente obligatorio relaciona cu e beneficio aki. Segun e organismo, falta di e control aki ta aumenta gasto di Gobierno y ta disminui efectividad di e medida.

CAft tambe a advirti cu tensionnan geopolitico internacional por afecta   turismo, cobransa di impuesto y costo di financiamiento negativamente den futuro. Pa e motibo ey, e organismo a recomenda Aruba pa sigui controla gasto y fortalece su reservanan financiero pa resisti posible crisis economico.

Ademas, e organismo di supervision a pone enfasis riba importancia di mas transparencia den maneho financiero di companianan propiedad di Gobierno. Aunke CAft a aprecia cu Aruba a inclui mas informacion tocante e entidadnan estatal den su raportahe financiero, ainda tin necesidad di mas claridad tocante riesgo financiero cu e companianan aki por representa pa finansa publico.

En conclusion, CAft a describi e posicion financiero actual di Aruba como positivo, pero a enfatisa cu disciplina fiscal, reformanan structural y bon planificacion di inversion lo ta esencial pa mantene estabilidad economico y fortalece resistencia financiero di pais na largo plazo.