MEP a exigi disculpa di secretario di estado pa declaracion riba Status Aparte y HOFA

ORANJESTAD – Lider di partido MEP, Evelyn Wever-Croes, diabierna atardi, a entrega un carta oficialmente na representante di Hulanda na Aruba, Vincent Storimans, cu un peticion pa secretario di estado hulandes Eric van der Burg ofrece disculpa na pueblo di Aruba despues di su reciente declaracionnan tocante Status Aparte y ley HOFA.

CONMOCION Y RABIA 

Segun Evelyn Wever-Croes, e palabranan uza pa secretario di estado a provoca “hopi conmocion y hasta rabia” den un parti di comunidad Arubano. “Nos a considera prudente pa reacciona awor riba esaki,” Wever-Croes a declara na Storimans.  “E discusion tocante HOFA nos ta tene aki na Aruba, entre gobierno y oposicion. Pero e expresionnan aki a crea hopi malo sangre den comunidad.”

LUCHA DI STATUS APARTE 

Durante e entrega di e carta, Wever-Croes a enfatisa cu Status Aparte ta algo cu Aruba a lucha duramente pa logra desde 1986 y cu no por wordo minimisa. “(Nos) Status Aparte no ta un ‘sorto di status aparte’. No ta un ‘sorto di pais’. Aruba ta un pais apart cu su propio condicionnan,” segun e lider di MEP. E la a critica especialmente e comparacionnan y expresionnan tocante “igualacion” entre Aruba, Corsou y Sint Maarten den contexto di HOFA. “Ningun hende na Aruba a pidi pa wordo iguala cu Corsou y Sint Maarten. Ken a bisa secretario di estado cu Aruba kier esey?” Wever-Croes a cuestiona. Segun e lider di MEP, si realmente tin cu  “iguala ” den Reino, e ora mester tambe considera pa otro paisnan drenta den e modelo di Status Aparte di Aruba, y no cu Aruba mester entrega autonomia pa adapta na otro paisnan.

DISCULPA

“Nos ta exigi disculpa, pero mas importante ainda: respeto pa pueblo di Aruba,” Wever-Croes a declara. E la a indica tambe cu e controversia tocante e expresionnan di vd Burg ta desviando e debate principal tocante HOFA. “E discusion no ta mas tocante tasa di interes ni autonomia. E expresionnan aki a contamina henter debate,” segun Wever-Croes.

ENTREGA DI CARTA Y REACCION STORIMANS

MEP a entrega e carta na nomber di su fraccion, partido y mas cu 10 mil persona cu, segun Wever-Croes, a firma contra HOFA. Representante hulandes,  Vincent Storimans a confirma recepcion di e carta y a indica cu esaki lo wordo entrega na secretario di estado. “Mi ta acepta e carta cu placer y lo pasa esaki door na secretario di estado. E reaccion posteriormente lo bini di dje y no di mi,” Storimans a declara. E la gradici Wever-Croes y miembro di fraccion MEP pa nan presencia y a desea nan un bon fin di siman.