Farro (ODEA): Enfermeria no ta pa tur hende; e profesion ta exigi fortaleza mental y emocional

ORANJESTAD – Durante un entrevista cu Tito Laclé den programa Noticiacla LIVE, presidente di ODEA, Sharlyn Farro, a comparti cu enfermeria no ta un profesion facil ni uno cu ta adapta pa tur hende. Segun e, enfermeronan diariamente ta enfrenta situacionnan emocionalmente fuerte y mester siña con maneha presion, tristeza y trauma mientras nan ta sigui duna cuido na pacientenan.

SEPARA BIDA PERSONAL DI TRABOU

Farro a splica cu den enfermeria bo siña desde comienso cu bo mester separa bida personal di trabou. “Bo ta siña cu ora bo drenta trabou, bo ta laga bo problema di cas na cas, y ora bo sali di trabou, bo ta laga trabou na trabou,” e la bisa. Sinembargo, e la enfatisa cu realidad no semper ta asina simpel, paso algun experiencia ta laga impacto profundo den un persona.

CASONAN TA VARIA 

“Tin caso hopi fuerte,” Farro a relata. “Ta algo bunita ora bo yuda un baby nace, pero no ta facil tampoco ora bo ta presente ora un hende ta hala su ultimo rosea.” Segun e, cada pashenty cada situacion ta diferente, locual ta exigi fortaleza emocional constante di enfermeronan. Presidente di ODEA riba e pregunta di Laclé cu a compara enfermeronan cu profesionnan manera polis y pilotonan, cu tambe ta enfrenta situacionnan di alto stress,  a bisa cu, aunke enfermeronan ta ricibi preparacion teorico y practico, ningun entrenamiento por prepara un hende completamente pa tur realidad emocional cu nan lo confronta. “Bo por siña hopi den buki y den rolspel, pero finalmente bo ta sigui hende,” Farro a expresa. “Bo mester tin un body, hende cu bo por papia cu ne ora algo impacta bo. Ta importante pa bo mental health pa bo no keda carga cu tur cos dentro di bo.”

HERRAMIENTA 

E la splica cu durante nan formacion y experiencia laboral, enfermeronan ta haya herramienta pa maneha stress, miedo y emocionnan fuerte. “Bo ta haya e tools pa sa con actua den e situacionnan ey,” e la bisa, agregando cu evaluacionnan emocional y di stres ta forma parti di e proseso durante carrera profesional.

MAS CU SOLAMENTE CONOCEMENTO MEDICO

Farro a conclui cu enfermeria ta un profesion cu ta exigi no solamente conocimiento medico, pero tambe humanidad, resiliencia y capacidad emocional pa sigui duna cuido, incluso den momento di hopi presion.