Ex-polis di NYPD a usa placa horta pa biahe pa Aruba, segun fiscal na Merca

RYE BROOK, NEW YORK – Un ex-agente di polis di NYPD (New York Police Department) a keda declara culpabel den un caso grandi di fraude y robo di identidad despues cu autoridatnan na estado di New York a descubri cu e la hiba mas di 113 mil USD for di cuenta bancario di clientenan di Wells Fargo, incluyendo hopi adulto mayor.

Segun e investigacion, Yeison Rodriguez Acosta, di 28 aña, a usa informacion bancario confidencial cu e  tabatin acceso na dje durante su trabou na e sucursal di Wells Fargo na Rye Brook. Entre mei 2024 y juni 2025, e la supuestamente saca USD 113.735,80 for di 26 cuenta diferente.

Autoridadnan ta bisa cu 12 di e victimanan tabatin mas cu 75 aña di edad. Algun otro victima no a participa den investigacion pa motibo di nan edad avansa.

E caso a causa conmocion na Merca, pasobra Rodriguez Acosta no solamente tabata ex-empleado bancario, pero tambe a drenta Academia di Polis di NYPD na october 2024 y a gradua na mei 2025, prome cu e investigacion a sali na cla.

Segun fiscal Susan Cacace, e acusado a traiciona confianza publico y a abusa di acceso na informacion priva di clientenan. “Ningun hende no ta ariba ley,” e fiscal a declara.

Investigadornan ta bisa cu e placa horta a wordo usa pa diferente gasto personal, incluyendo pago pa un BMW X6 di 2024, restaurante, Airbnb, seguro GEICO y hasta un biahe pa Aruba.

E caso aki ta sigui yama atencion den Merca, specialmente pa e manera cu e fraude a dura casi dies luna prome cu autoridadnan a logra pone fin na esey. Rodriguez Acosta lo wordo sentencia den luna di september.