Magic FM ta priminti cobertura historico pa Copa Mundial FIFA 2026

ORANJESTAD – Magic 96.5 FM ta prepara pa lansa loke e emisora ta yama e cobertura di futbol mas grandi y ambicioso cu Aruba a mira pa Copa Mundial FIFA 2026. Despues di un promocion exitoso unda un oyente a gana un biahe exclusivo pa presencia e prome partido historico di Corsou den Mundial, e stacion di radio ta anuncia cu hopi mas premio, concurso y sorpresa ainda ta na caminda.

Na centro di e cobertura lo ta reconocí narador Cadochi Kock, hunto cu panelista Devin de Veer y analista Arianne Westerburger, cu lo brinda narracion, analisis y reaccionnan profundo durante henter campeonato. E produccion tecnico lo ta den man di Trevor Rosel, Allen Rafael y Reno Irausquin, bou direccion di Erin Croes.

Magic FM a indica cu e cobertura no lo ta limita solamente na partidonan, pero tambe lo inclui noticia di ultimo momento, entrevista, clasificacionnan, reaccionnan y reportahenan special for di paisnan anfitrion y fanaticada mundial. Segun e emisora, e meta ta pa haci cada oyente sinti manera cu nan mes ta presente den Mundial.