Eman na Hulanda: Gobierno lo dedica mas recurso pa preserva historia y patrimonio cultural di Aruba

DEN HAAG - Mike Eman a anuncia na Hulanda cu gobierno lo dedica mas recurso pa preserva historia y patrimonio cultural di Aruba, haciendo e mas accesibel pa pueblo y investigadonan. Durante un bishita oficial na Stadsarchief Amsterdam na Hulanda, e delegacion di Aruba a intercambia conocemento tocante digitalisacion y conservacion di documentonan historico. Gobierno ta mira e cooperacion aki como un paso importante pa fortalece y modernisa Archivo Nacional Aruba.

Segun Eman, Aruba ya ta wordo reconoci internacionalmente pa su trabao den digitalisacion di archivonan historico. Tambe a confirma cu Hulanda tin documentonan tocante Aruba cu ta data for di siglo 16, incluyendo referencia for di 1523, cu actualmente ta den proceso di digitalisacion.

Gobierno tambe ta inverti den diferente proyecto cultural y historico cu fondo di compensacion pa sclavitud, incluyendo restauracion di tankinan historico di Kibaima pa bira centro di Archivo Nacional Aruba, un publicacion historico hunto cu Luc Alofs y creacion di un monumento dedica na un muhe arubiano cu a lucha contra sclavitud.