Gobierno ta modernisa servicio di taxi cu plataforma digital Taxi.aw

ORANJESTAD – Gobierno di Aruba oficialmente a lansa e plataforma digital Taxi.aw, un website nobo unda pasaheronan por calcula tarifanan oficial di taxi di antemano den un forma rapido, cla y accesibel. E plataforma a wordo presenta dialuna door di minister di   Transporte Publico, mr. drs. Arthur Dowers, mientras cu e tarifanan actualisa oficialmente lo drenta na vigor diaranson 20 di mei 2026.

Cu e “Taxi Fare Calculator”, usuarionan por wak exactamente con e prijs final ta wordo calcula, incluyendo cantidad di pasahero, maleta, uzo di bahul, dianan di fiesta y suplemento pa orarionan laat entre 11’or di anochi y 7’or di mainta.

Segun minister Dowers, e meta principal di Taxi.aw ta pa crea un sistema di taxi mas moderno, transparente y confiabel pa taxistanan, pasaheronan y sector turistico.

E website tambe ta brinda informacion oficial tocante reglanan y condicionnan di servicio di taxi. Bao di e seccion “Downloads”, tin documento oficial, flyers, posters y QR-codes disponibel pa uso den taxi, hotelnan, aeropuerto y otro sitio turistico.

Un di e componentenan mas importante di e plataforma nobo ta cu pasaheronan awo por entrega reclamo directamente online den caso di overcharging of otro irregularidad relaciona cu servicio di taxi.

Gobierno a indica cu Taxi.aw ta solamente e prome paso den e modernisacion di transporte publico, y cu den futuro lo sigui amplia e sistema cu mas destinacion y funcionalidadnan.