Riohacha ta celebra 200 aña di relacion historico entre Colombia y Reino Hulandes

RIOHUACHA - Ciudad di Riohacha a bira escenario di importante celebracion pa conmemora 200 aña di relacion diplomatico entre Colombia y Reino Hulandes, cu fuerte participacion di Aruba, Corsou y comunidadnan cu raiznan Caribe-Hulandes.

Bajo e lema Wayuunaiki “Mma Pe’ipaasü” (“E tera cu ta uni nos”), diferente actividad cultural, academico y diplomatico a tuma luga pa destaca e lazonan historico, familiar y cultural entre La Guajira y islanan di Reino Hulandes.

Aruba a hunga un rol importante durante e celebracion, cu participacion di representante culturalnan, artistanan y organizacionnan manera Stichting Rancho. Artistanan Arubiano Alydia Wever y Ryan Oduber a presenta e performance “Cunucu di Seit”, mientras grupo teatral Ban Papia di Teatro di Aruba a presenta obra “Walekerü”.

Tambe tabatin lanzamiento di segunda edicion di Revista SER Caribe, cu colaboracion di autor y investigadornan di 10 pais Caribeño, incluyendo Aruba. E portada di revista a wordo dedica na linguista Arubiano-Riohachero Ramon Todd Dandaré.

Durante varios panel academico y cultural, participante nan a discuti relacionnan historico, desarrollo economico, cultura y conexion familiar entre Aruba, Corsou y La Guajira.

E evento a sirbi como un momento di fortalecemento di cooperacion cultural y historico entre Colombia y Reino Hulandes, resaltando especialmente e conexion profundo entre Aruba y region di La Guajira.