Gobierno bou presion pa controla efecto, y prijs di gasolin y diesel ta sigui subi

ORANJESTAD – Aruba lo mira un otro aumento den prijs di combustibel entrante mayan 13 di mei 2026, cu gasolin , diesel y kerosin tur subiendo den prijs den medio di presion internacional riba mercado di petroleo y preocupacion creciente tocante costo di bida na e isla. Ministerio di Finansa, Asunto Economico y Sector Primario a anuncia cu gasoline unleaded-premium lo subi pa 265,2 cent  pa litro, esta un aumento di 17,2 cent . Diesel ULS lo subi pa 257,0 cent  pa litro, un aumento di 10,5 cent , mientras kerosin lo alcanza 301,6 cent  pa litro, subiendo 7,6 cent . Tur prijs ta inclui impuesto BBO, BAZV y BAVP.

AUMENTO FUERTE

E subida aki ta sigui e aumento fuerte cu Aruba a experimenta na luna di april, ora cu gobierno a dicidi intervini y absorbe parti di e subida internacional pa evita un impacto ainda mas duro riba consumidor y sector comercial. Na e momento ey, gobierno a confirma cu a absorba aproximadamente mitar di e aumento den gasoline y diesel pa proteha poder adquisitivo di ciudadano y limita efecto riba prijs di productonan y servicio. Segun minister Geoffrey Wever anteriormente, e decision di subsidia parti di e subida tabata necesario pa evita cu e aumento di costo di transporte y logistica pasa directo pa consumidor final, especialmente den un economia manera Aruba cu ta depende hopi riba importacion y transporte.

Cu e prijs nobo, Aruba awor ta drenta un periodo unda combustible ta permanece considerablemente mas caro compara cu principio di 2026. Na januari ainda tabatin un reduccion importante den prijs di gasoline, diesel y kerosin, algo cu tabata ofrece cierto alivio pa consumidornan y empresa nan. E preocupacion principal awor ta e efecto indirecto cu e subida di combustibel por tin riba prijs di cuminda, transporte, servicio y costo operacional di empresa nan. Specialmente sectornan manera transporte, construccion, turismo y comercio ta sigui vulnerabel na fluctuacionnan internacional di petroleo.

Gobierno anteriormente a indica cu ta monitoreando situacion internacional hunto cu Banco Central di Aruba y CBS pa evalua si e presion riba prijsnan ta temporal of si por tin necesidad di mas intervencion economico. Mientrastanto, e ciudadano y sector comercial lo mester ahusta nan gasto bek frente na un otro aumento di combustibel cu, aunke mas moderado cu esun di april, ta confirma cu presion economico internacional ainda ta impactando Aruba directamente.