Hues ta ordena bancarota di Air Antilles: fin pa compania di aviacion Caribense

POINTE-À-PITRE  — E compania di aviacion regional Air Antilles a wordo declara den bancarota y asina lo no por sigui bula mas. E decision a laga 116 empleado den incertidumbre.

E desicion a wordo tuma dialuna door di corte comercial mixto na Pointe-à-Pitre. E hues a rechasa tur ofertanan di tuma over cu tabatin ainda, pa motibo di falta di base financiero suficiente y obstaculonan huridico. Un ultimo intento pa sigui cu e compania bou di un nomber nobo a wordo considera demasiado riesgoso. Un otro oferta, cu tabata miho, a wordo retira despues cu e oferente no a logra demonstra cu e tabatin e financiamiento necesario.

E compania a opera   rutanan ABC pa varios aña na encargo di WINAIR for di Sint-Maarten.

Pasobra cu no tabatin niun plan realista pa salba e compania, e corte a ordena pa e compania stop tur su actividadnan mesora. Un curador lo encarga cu e proceso di bancarota y lo inventarisa debe nan y guia e proceso cu creditornan.

FUNCION IMPORTANTE DEN CARIBE

Air Antilles a cumpli durante hopi aña un rol importante di conexion entre e islanan den Caribe frances, incluyendo Guadeloupe, Martinique, Sint-Maarten y Dominica. E compania tambe a traha hopi aña den cooperacion estrecho cu WINAIR. E desaparicion di Air Antilles ta causa preocupacion tocante menos accesibilidad den region, prijs di pasashi mas halto y consecuencianan negativo pa sector di aviacion y turismo.