Avianca rabia riba influencer Colombiano cu a activa stinkbom riba Oceano Atlantico

BOGOTA - E aeroliña colombiano Avianca ta hibando influencer Yeferson Cossio corte. Dia 11 di maart 2026, riba buelo AV46 for di Bogotá pa Madrid, e  supuestamente a activa un bomb  quimico di mal holor, conoci crioyamente como ‘stinkbom’. E avion mester a regresa. E incidente a sosode riba Oceano Atlantico, leu for di cualkier aeropuerto unda e avion por a desvia. Segun Avianca, e accion a afecta seguridad y condicionnan higienico riba bordo. Como resultado, e compania a cancela su buelo di regreso y a termina e acuerdo di transporte cu Cossio. Asina e compania a declara dia 29 di maart.

MIYON DI SIGUIDORNAN

Cossio ta un influencer conoci cu mas di 4 miyon di siguidornan riba YouTube y 19 miyon riba TikTok. Cossio a pone duda riba gravidad di e incidente den un mensahe publica dia 31 di maart riba su canal di YouTube. E la bisa cu e aparato a activa accidentalmente ora e   tabata buska un etui, den su handbagage. “Mi ta sinti mi hopi tristo di con e situacion a wordo exagera y presenta di otro manera,” e la bisa.

“NO TABATA UN JOKE”

“E  loke a pasa riba avion no tabata un joke,” segun Cossio, kende a bisa cu ta asumi responsabilidad, pero cu e situacion ta wordo exagera. Riba su red socialnan tin un video reciente unda e ta usa un aparato manera “cojin di pedo”, cu ya a causa reaccion negativo den cabina di avion.

YAMADA PA LEY MAS STRINGENTE

Avianca ta uza e incidente pa pidi ley mas estricta contra mal conducta di pasaheronan den Colombia. E compania ta yama legisladornan pa pone castigo mas duro y maneha e caso nan mas rapido. Aeroliñanan frecuentemente ta enfrenta problema cu pasaheronan dificil. Recientemente, Transavia a propone un prohibicion di buelo di diez aña pa un pasahero cu a causa disturbio.