F1 ta cancela caredanan di Bahrein y Arabia Saudita pa motibo di conflicto den Medio Oriente

LONDRES - Formula 1 a confirma cu e caredanan di Bahrein y Arabia Saudita pa temporada 2026 no lo wordo cori, pa motibo di e conflicto continuo den Medio Oriente. Cu e decision aki, e calendario di Formula 1 pa 2026 awor ta wordo reduci pa 22 careda. Originalmente, Formula 1 tabata programa pa core na Bahrein entre 10 y 12 di april, como e cuarto ronda di temporada. Un siman despues, e campeonato tabata plania pa core na Jeddah, Arabia Saudita, entre 17 y 19 di april. Pero ambos pais ta entre e estadonan den Golfo cu recientemente a wordo afecta pa atakenan di Iran, como reaccion riba atakenan aereo di Estados Unidos y Israel.

NINGUN REEMPLASO PA E CAREDANAN

Diferente circuito alternativo tabata wordo considera pa reemplasa e dos careda den april, pero finalmente organizadornan a dicidi no pone ningun otro careda den e fechonan ey. E rondanan di Formula 2, Formula 3 y F1 Academy, cu tabata programa durante e doble evento di Bahrein y Arabia Saudita, tampoko lo wordo cori manera tabata plania.

DECISION DIFICIL PA FORMULA 1

Presidente y CEO di Formula 1, Stefano Domenicali, a bisa cu e decision no tabata facil. “Siendo un decision dificil, infelizmente ta e decision correcto considerando e situacion actual den Medio Oriente,” Domenicali a declara. E la agrega cu e ta gradici FIA y tur promotoran di e evento, cu tabata mira cu entusiasmo pa recibi Formula 1, pa nan comprension y apoyo durante e situacion actual.