Pitcher di grandes ligas, yiu di Corsou Kenley Jansen a firma cu Detroit pa 11 miyon dollar

WILLEMSTAD – Kenley Jansen,den fin di siman ultimo, a firma un kontrato pa un temporada cu Detroit Tigers, cu un opcion na fabor di e ekipo pa un di dos aña. E closer yiu di Corsou, cu cuatro aparicion den All-Star Game y veterano di 16 temporada den MLB, a firma un contrato di 11 miyon dollar pa temporada 2026, cu un opcion pa e ekipo retene el pa 2027. E acuerdo ta pendiendo di su examen fisico, locual ta algo normal cerca tur pelotero profesional.

Jansen tin 476 wega salba den su carrera, solamente dos bou di Lee Smith, cu ta ocupa e tercer lugar riba e lista historico di MLB. E la registra por lo menos 25 wega salba den diestres temporada consecutivo, excluyendo e temporada di pandemia 2020. E aña aki e la termina cu 29 saves, resurgiendo cu Los Angeles Angels. Su tasa di strikeout di 24.4 porciento tabata un di e mas halto den su carrera, mientras cu su WHIP di 0.95 tabata e mihor desde 2017, tempo cu el a comparti e liderato di Liga Nacional cu 41 wega salba y a termina entre e promé cinco den votacion di Cy Young.

Temporada 2025 tabata un temporada cu momentos tumultuoso pa e yiu di Corsou, specialmente riba 2 di mei na Angel Stadium, ora cu el a permite seis carrera den e noveno inning, incluyendo dos home run consecutivo di Riley Greene y Colt Keith, y despues un otro home run adicional. Sinembargo, e siguiente dia e la regresa y a retira tur bateador den un situacion di presion, salbando e partido ora cu Angels tabata dilanti cu tres carrera.

Kenley ta e di cinco ekipo di MLB pa kende e ta hunga. Detroit Tigers den 2025 a funciona di forma aceptabel sin un closer fijo, cu manager A.J. Hinch escogi pa usa su mihor relevistanan den situacionnan clave sin importa e inning. Will Vest a lidera e ekipo cu 23 wega salba, pero cinco otro pitcher tambe a logra saves, incluyendo nuebe di Tommy Kahnle. Mas aleu, e ekipo a logra un acuerdo pa trae Kyle Finnegan bèk pa 2026, y cu e adicion di Jansen, Tigers awor tin un bullpen fuerte pa controla e septimo y octavo inning, lagando e nobeno entrada na man di e yiu di Corsou.

Kenley Jansen a cuminsa su carrera como closer cu Los Angeles Dodgers, despues cu Atlanta Braves, Boston Red Sox, Los Angeles Angels, y pa 2026 lo bisti uniform di Detroit Tigers.