Reparticion pa sorteo di Copa Mundial di Futbol ta definitivo: Corsou den pot 4

WASHINGTON - E seleccion nacional di Hulanda ta den pot 1 pa e sorteo di Copa Mundial di futbol, cual sorteo cu lo tuma luga diabierna 5 di december. FIFA a faya publica cu e cuatro potnan ta definitivamente regla. Un cos particular ta cu tur ganadornan di e play-offnan cu tin cu wordo hunga ainda lo cay den pot 4. Esaki ta conta tambe pa Italia, cu si e tabata cualifica directo, e tabata wordo pone den pot 2 basa riba su ranking den lista mundial di FIFA. E lista ey a wordo usa pa dividi tur pais cu ta cualifica den cuatro pot diferente. Pa e paisnan anfitrion Canada, Merca y Mexico un excepcion a wordo haci. Nan no ta den e top di ranking mundial segun FIFA, pero pa e sorteo di siman cu ta bini nan ta den pot 1. Na banda di Hulanda, den e mes pot tin Belgica, Alemania, Spaña, Argentina, Francia, Inglatera, Brasil y Portugal. Esaki ta e prome nuebe pais den ranking.

FIFA a bisa cu pa e cuatro pais mas halto den ranking lo tin un excepcion den reparticion. Spaña y Argentina, despues di sorteo, lo wordo separa den diferente ruta pa knockout pa evita cu nan topa antes di final. E mesun regla ta pa Francia y Inglatera. Nan por topa solamente den final, si nan gana nan grupo.

Marokko den pot 2

Noruega cu Haaland den pot 3

Corsou den pot 4 (Italia y Suriname por yega ei tambe)

Den pot 2 tin hopi pais cu recientemente a yega leu den un Copa Mundial. Marokko a yega semifinal den Qatar 2022, y Croatia a yega final den 2018.

Riba papel, Noruega ta e pais mas fuerte den pot 3. Nan tin hungadornan manera Erling Haaland y Martin Odegaard, un team cu hopi calidad, y nan a demostra esaki den e cualificacion. Nan a keda prome den un grupo cu Italia entre otro. Noruega a vence Italia dos biahe cu score convincente: 3-0 y 4-1.

CORSOU Y CABO VERDE

Den pot ultimo tin seis pais, includiendo Corsou y Cabo Verde. E dos seleccionan cu hopi lazo cu Reino Hulandes ta haci nan debut den un mundial. Un di nan por bira un oponente di Hulanda. Si Suriname logra cualifica via intercontinental play-off, nan tambe lo yega den pot 4.