René Herde na Mep riba CFT: Boso ta gaña atrobe

ORANJESTAD – MEP recientemente den un articulo, a laga sa cu e raport di CFT ta confirma cu MEP a hiba un bon maneho financiero. Como prueba MEP ta cita e raport di CFT cu a skirbi cu den aña 2008 tabata tin un surplus riba presupuesto y cu e aña despues ya caba esaki a bira un deficit grandi. Cu esey MEP kier crea e impresion cu CFT ta papia berdad y cu gobierno di MEP lo a goberna bon. (lesa e articulo aki di MEP riba NoticiaCla)

Segun lider di fraccion di AVP, Rene Herde, e berdad ta totalmente diferente. Herde ta bisa cu e expertonan di CFT a scohe pa uza cifra di un aña so -2008- di e relato economico anual di Banco Central di Aruba. Den e relato di Banco Central ta mustra cu e balansa riba presupuestonan pa añanan largo tin un DEFICIT HALTO! (mira e grafico )E relato di Banco Central y e grafico ta mustra cu durante di e periodo di gobierno di MEP tur aña for di 2005 tin deficit nan grandi. “E unico aña, esun net prome cu eleccion, diripiente gobierno di MEP tabata tin un surplus. Pero e aña despues, manera e cifranan di Banco Central ta mustra y cu CFT mes ta menciona, e deficit tabata enorme” Herde ta sigura. Loke MEP a lubida, segun Herde, ta cu ta gobierno di MEP mes a goberna henter aña 2009. Ta apenas na fin di e aña 2009, dia 30 di october 2009, gobierno di AVP a drenta gobierno. Kier men cu ta henter e aña 2009 tabata di gobierno di MEP. “No di AVP !!!” Herde ta sigui bisa. E deficit enorme di 2009 tambe tabata e trabou di gobierno di MEP. “ Anto esey ta sin menciona e desempleo cu a subi te pa 10.4%, e cantidad di compania cu a sera, e centronan di nos ciudad den decadencia, welganan di trahadornan cu tabata exigi nan pago y problemanan social tur caminda.”

Segun Herde, e conclusion cu mester saca di e declaracion di e lider di MEP y di e raport di CFT ta: e raport di CFT riba e punto aki tambe ta incompleto. E declaracion di MEP cu e gobierno di MEP a goberna bon ta otro gañamento flagrante di MEP.