Segun MEP, CFT ta confirma cu nan a goberna bon

ORANJESTAD – Partido di oposicion MEP ta considera cu e quick scan di College Financieel Toezicht, ta confirma cu e partido geel a goberna Aruba bon ora cu e tabata den gobierno. Asina e partido ta indica den un comunicado. Segun e partido, e rapport a señala algun punto importante Segun MEP, CFT ta mustra cu na 2008 tempo cu nan (MEP) tabata den gobierno, tabatin un surplus di 1%, cu ta nifica mas entrada cu gasto. CFT den su raport ta mustra cu den 4 aña, Aruba su deficit a crece te na casi 10% na 2012, bah‘e bek na 7%. MEP ta considera pues cu nan gobierno a haci un miho trabou cu e partido na mando. “E buraco den presupuesto a bira masha masha grandi mes, y a yega nivelnan totalmente inaceptable” MEP ta sigui bisa.

Pa e partido heel esaki ta interesante pasobra CFT cu ta un instancia critico, ta duna MEP bon punto. E partido ta sigui mustra cu segun e scan di CFT, e debe tempo di gobernacion di MEP, e debe a bay di 41.5% te na 75 % den apenas 4 aña.