Update: Conseho di CAFt riba caso AWSS, tabata dirigi pa gabinete actual

ORANJESTAD – E noticia cu Noticiacla a (re) produci, tocante un conseho no solicita duna door di e colegio di supervision financiero su presidente recientemente, a causa basta consternacion. Y sigur den e seno di oposicion. Ta trata di e articulo di cual Noticia a ‘reproduci’ di un otro fuente (dossierkoninkrijksrelaties.nl) cu ta bisa cu CAFt a manda un conseho no solicita, riba e proyecto di Bubali Plas, cu gobierno anterior a dicidi pa pasa bou di maneho di AWSS. Den e articulo cu Noticiacla a reproduci, a bisa cu CAFt a manda e conseho no solicita pa ex-prome minister Evelyn Wever-Croes. Y esey ta tambe e unico punto incorecto di henter e articulo. Esey no kier men cu Noticiacla a produci henter un noticia ‘falso’, sino a reproduci un punto robez.   

E CONTENIDO

E berdad ta, cu e ex-prome minister (Evelyn Wever-Croes) enberdad no a ricibi e carta. Pero, e contenido completo ta bay tocante un decision tuma y structura den cierto forma door di su gabinete. Pues pa loke ta e contenido mes, esta e preocupacion di no a percura cu bon palabracion pa scapa e 190 miyon di interes, ta algo cu e gabinete nobo tin cu resolve, pero cu no ta nan a causa esaki. Den otro palabra, e ‘buraco’ financiero, ta keda existi, (paso AWSS mester fia placa) te ora cu dicidi pa cumpli cu e rekisitonan pa haya fiansa mas favorabel den Reino. 

KICO NOTICIACLA A HACI ROBEZ?

Enbes di clarifica cu e unico cos cu no tabata corecto, tabata na ken e conseho a keda dirigi, a tilda Noticiacla di trece henter un noticia falso. Loke cu Noticiacla a haci, ta  cita un otro medio, cu a trece e noticia inicial. E noticia no ta falso. E unico diferencia ta cu e carta, ta dirigi na e gobierno actual, y no ex-prome minister Wever-Croes. Pero e base di e noticia ta completamente corecto. E presidente di CAFt mes a confirma cu e contenido di e carta emiti (e conseho), ta corecto y ta solamente cu e tabata dirigi na e gobierno actual, y no e gobierno anterior. Noticiacla ta lamenta e fayo, cu a haci e mencion incorecto den direccion di e gabinete anterior. Pero ta importante semper tambe, pa  bisa e cos completo, manera cu e ta. 

LASTRAMENTO

E ex-prome minister a bay riba Facebook, y haci como si fuera cu Noticiacla ta custumbra di ta scirbi cos cu bo ‘no por kere’, usando e palabranan manera ‘un biaha mas’. Noticiacla no ta un spindokter, y mas aun, no tin ningun interes pa ‘desvia atencion di e caso di Mike de Meza’, manera cu e post di FB kier indica. Den periodismo, ta normal cu un medio ta cita un otro medio, y door di cita e otro medio, ta ubica e responsabilidad riba e medio ey, manera cu Noticiacla a haci claramente, cuminsando cu e titulo di e articulo. Di otro banda, Noticiacla ta custumbra tambe, cu ora cu e partido encuestion no ta contento cu e contenido, e partido ey ta core tilda e medio ey di tur sorto di cos, for di mentiroso, y un cantidad di cos mas. C’est La Vie.