Segun CAFt: Gabinete Wever-Croes ta laga Aruba cu un buraco di 200 miyon

DEN HAAG/ORANJESTAD  – E ex gabinete Wever-Croes II a laga comunidad di Aruba cu un buraco financiero di casi 200 miyon florin. Esaki a wordo descubri door di e accountantnan di Hunta di Supervision Financiero di Aruba, segun e portal hulandes dossierkoninkrijksrelaties, dialuna. Por lesa di e suma den un ‘conseho no pidi’ cu e colegio a emiti mas tempran e aña aki na Prome Minister di e tempo ey Wever-Croes, pero cu nunca a wordo haci publico. Awor el a sali pa motibo cu presidente di CAft Lidewijde Ongering a mencion’e den un combersacion cu Comision di Relacionnan di Reino di Senado. Mester bisa cu conseheronan financiero a informa e portal aki, cu porta CAFt no a compronde e structura di e 'deal' aki, ya cu no ta trata di un prestamo regular, sino un unda cu turistanan ta paga un suma pa drenta Aruba y esey ta financia e suma. 

BLUNDER MIYONARIO 

Segun CAft, e blunder multimiyonario ta resultado directo di e privatisacion di e instalacion di tratamento di awa di riool na Bubali, concebi pa Prome Minister Wever-Croes y Minister di Finanzas Xiomara Maduro (ambos MEP). Aña pasa, e WWTP a wordo traspasa for di Departamento di Obra Publico (DOW) pa e compania gubernamental Aruba Wastewater Sustainable Solutions, un subsidiario di Utilities Aruba NV, cu a wordo lanta cu prisa specialmente pa esaki.\ “AWSS a wordo distancia di gobierno, pero e manera cu e ta wordo organisa ta un problema pa loke ta trata gobernacion. E construccion aki lo conduci cu mester tuma prestamonan hopi caro riba mercado liber. Nos a calcula cu esaki lo encera casi 200 miyon florin na gastonan adicional,” Ongering a revela na miembronan visiblemente sorprendi di e comision.

Segun e presidente di CAft, e por tabata hopi mas barata: " E presupuestonan na gobierno ta suficiente. Y despues AWSS ta tuma un prestamo riba mercado liber cu un prijs hopi halto. Cu tur e consecuencianan financiero cu esey ta encera. Esey ta eficiente?" Na final di cuenta, e gastonan adicional lo wordo carga door di e pagador di belasting Arubano pa medio di e presupuesto nacional.

No ta prome biaha cu CAft ta cuestiona e politica financiero di gabinete Wever-Croes. Djis promé cu e (forsa pa e votadonan) a anuncia su retiro, un reduccion di belasting a wordp implementa rapidamente tras di lomba di e Estadonan, loke a krea un buraco anual di 50 miyon den e presupuesto di gobierno. E medida lo beneficia principalmente entradanan mas halto. Como ‘compensacion’ e pensionadonan, hopi di nan ta biba bou di e liña di pobresa, tabata haya un toeslag pa luna di 30 florin.

Ta mas of menos un coincidencia cu e asunto a sali na cla, pasobra e asina yama ‘conseho no solicita’ brinda door di CAft ta confidencial.