Conseho di minister diabierna a trata problema di rijbewijs

ORANJESTAD – E topico di problema cu rijbewijs, a haya atencion di gobierno diabierna. NoticiaCla.com tin confirmacion cu diabierna ultimo, conseho di minister a trata e topico aki y cu e siman aki lo bin mas claridad riba e asunto aki. No ta conoci si e articulo y e reaccionnan ariba, cu a aparece riba NoticiaCla.com diabierna (lesa articulo aki), tabata motibo di e tratamento ‘inespera’ aki diabierna. Ta confirma cu e no tabata riba agenda, pero cu diripiente esaki a wordo trata.

ARTICULO RIBA RIJBEWIJS

Manera ta conoci, e asunto di rijbewijs un biaha mas tabata den ‘boca di pueblo’ siman pasa ora cu varios persona a cuminsa critica publicamente usando rednan social. NoticiaCla.com a papia mesora cu e persona encarga cu rijbewijs, esta inspector 1ste klas Ricardo Muller, cu a desmenti cu tin scarsedad di material pa rijbewijs. E articulo a causa basta disgusto serca esnan cu a les ‘e y a critica aun mas fuerte.

CLARIDAD

Basa riba e situacion, conseho di minister a trata e topico aki diabierna ultimo, y a dicidi cu e siman aki lo bin cu ‘un splicacion mas concreto di e situacion’ riba rijbewijs. Aparentemente e tin cu trece mas ‘claridad’ pa esnan afecta y mas importante, pa esnan cu ta biahando pa exterior y cu kier uza e rijbewijs pa core auto den exterior.