Muller: No tin scarsedad di material pa traha rijbewijs na Aruba

ORANJESTAD – “No tin escases di material pa (traha) rijbewijs”. Asina Inspector eerste klas Ricardo Muller a sigura NoticiaCla.com diahuebs anochi. Aunke gozando di vacacion te na New York, e la coopera pa duna informacion, mirando e importancia di e topico. El a reacciona riba e asunto di keho cu tin atrobe riba e.o scarsedad di rijbewijs y problema pa acepta esaki den exterior. Muller, cu ademas di ta hefe di departamento di trafico pa Aruba, ta encarga tambe cu e proceso di rijbewijs. Segun Muller, tur cos ta ok, y ta solamente falta di informacion ta pone cu hende ta crea e impresion robez. E la sigura cu tur cos ta bon y cu tin splicacion pa tur e loke ta wordo bisa.

SCARSEDAD DI MATERIAL

Riba e keho, cu no tin material pa traha rijbewijs, sea e papel blanco of/y roos pa traha rijbewijs, esey no ta completamente berdad. Muller a splica cu ‘door cu e rijbewijs roos nobo ta na caminda, no ta bale la pena pa order material bieu’. Si bo haci esey, bo ta get ‘stuck’ cu nan despues. Actualmente ora cu hende busca rijbewijs, nan ta wordo bisa cu no tin e papel, cu de facto ta corecto. Pero no ta pasobra tin scarsedad, pero pasobra simplemente no a busca mas, pa e motibo conoci.

RIJBEWIJS INTERNACIONAL

Pa loke ta e parti di rijbewijs internacional, Muller ta bisa cu ‘tin biaha hende ta pensa cu e rijbewijs mester ta roos pa core na Merca’. Algo cu no ta berdad. “E por ta geel, berde, oranje, tur color. Importante ta pa e rijbewijs ta registra den e ‘log’. E log ta e registro oficial cu e pais internacional ta mantene di paisnan ‘stranhero’ cu ta uza como rijbewijs internacional. E forma con esaki ta funciona segun Muller, ta cu semper prome cu e aña cuminsa, Aruba tin cu ‘geef door’ si tin cambio den e tipo di rijbewijs cu e pais lo uza’. E problema ta, cu no a geef door esun aki lo ta blanco, pasobra ‘e ta temporal’.

ACEPTACION DI E RIJBEWIJS

Muller a splica cu na Hulanda p.e no tin problema cu e rijbewijs blanco. “Hasta nan ta tume di nos hendenan y ta duna nan un rijbewijs hulandes’. Y segun Muller, tur luna nos ta haya cantidad di rijbewijs valido cu a wordo cambia na Hulanda, pa nos (polis) pone den file. “E unico problema enberdad ta cu nos a spera di a haya e carchinan ‘blanco’ cu seguridad cu nos mes ta procesa na Aruba. Pero jammer genoeg a tarda un tiki” Muller a sigui bisa.

CAR RENTAL

E la compronde tambe, cu no tur car rental (p.e. na Merca) ta tuma esun blanco awor. “Ta depende cua car rental nan bay, pasobra riba e rijbewijs internacional, e nomber ‘international rijbewijs’ mes ta bisa tur cos segun Muller. Tin car rental cu no conoce e reglanan internacional, siendo cu tin un tratado di Geneva y Paris, den cual tur e asuntonan aki ta bon regla. “Nos a procesa tur luna basta di e rijbewijsnan internacional, y casi niun no a haya keho” Muller a bisa.

RIJBEWIJS PROPIO

Tabata na comienso di aña cu minister encarga cu husticia, Arthur Dowers a sigura cu pa fin di juli e aña aki, lo Aruba keda cla finalmente pa por saca su ‘propio’ rijbewijs localmente, sin tin cu mande den exterior prome. Pero e proceso, pago y otro cosnan a pone cu a tarda mas cu a spera, cu tur su consecuencia cu esaki por a trece cune. Y hunto cune, tur e inconveniencia aserca. Entre nan, cu hendenan cu mester renova e rijbewijs, tin problema, esnan cu kier uno internacional, ta haya uno pero cu posiblemente no ta wordo reconoci, tur pa motibonan conoci. Y awor cu vacacion cuminsando, y hendenan cu mester di dje pa biaha, e por a crea e iritacion cu por stroba un persona.