- Prijs di gasoline ta habri aña cu un reduccion considerabel diaranson
- Cantante Julio Iglesias (82) acusa di violacion y explotacion di empleadonan hoben
- Tres shen studiante caribeño lo ricibi guiamento adicional pa nan estudio na Hulanda
- Rey Willem-Alexander: ‘Hulanda y Corsou lo yega leu na Mundial’
- Corte na Marocco a confirma castigo di pena di morto pa dos yiu di Corsou
Arends: A instala dos FADs pa impulso di pesca sostenibel
ORANJESTAD - Diahuebs ultimo a instala dos Fish Aggregating Devices(FADs). E iniciativa aki ta traha un innovacion clave pa practica di pesca mas eficiente y sostenibel, protehando nos habitat marino y aumentando e produccion di pisca.
E introduccion di e FADs ta un cambio fundamental pa e sector, duna piscadonan un metodologia nobo pa atrae pisca for di e area sin daña e ecosistema. Ta spera cu den 4 pa 6 siman, piscadonan lo mira un aumento den cantidad di pisca den e area, optimisando nan rendimento y reduci costo di operacion.
E FADs nan a wordo instala na e siguiente cordinatnan:
• Cabes di Aruba: N 12.28.240 | W 069.49.477
• Noord oost di Aruba: N 12.41.286 | W 70.05.266
Ta corda piscadonan cu no ta permiti mara of ancra na e FADs pa garantisa nan durabilidad y funcionalidad.
Un avanse tecnologico pa nos industria di pesca, FADs ta conoci mundialmente como un innovacion pa pesca eficiente. E structuranan ta flota na lama y ta atrae un variedad di pisca manera dorado, tuna, mulato y balahu, creando un area optimal pa pisca sostenibel.
E beneficio di e FADs ta hopi amplio:
• Eficiencia mas halto – Piscadonan por bay direct na e FADs, sin perde tempo buscando pisca, asina ta gasta menos fuel.
• Ingreso mas halto – Operacion mas eficiente ta trece un ambiente economico mas grandi pa piscadonan y charter boats.
• Consumo di pisca fresco – Mas disponibilidad di pisca fresco local lo yuda pa pueblo come mas saludabel.
• Desaroyo Economico – Aumento di produccion y benta di pisca ta contribui na economia local incluyendo restaurant.
E instalacion di e FADs ta e resultado di un colaboracion entre Varadero, Santa Rosa y Ministerio di Naturalesa. Cada FAD ta diseña pa sostenibilidad a largo plaso, consistiendo di un boei di superficie y un sistema di ancra resistente, uzando rope di Dyneema. E proceso di instalacion a wordo realisa cu un barco comercial y un boto di apoyo, mientras expertonan a inspecciona tur conexion bou di e boei pa garantisa su siguridad. E AIS ta sendi cual tur barco por wak e FAD’s ariba nan AIS direct, asina percura cu barco no pasa ariba.
Pa e FADs por cumpli su mision, ta importante pa respeta e regulacionnan y mantene e structuranan den bon estado:
• No por ancra of mara boto na e FADs.
• No por uza red chikito of captura pisca chikito rond di e FADs.
• Mantene un distancia sigur pa evita daño na e structura.
• Raporta cualkier problema na e team di Varadero.
Un sistema di comunicacion lo wordo implementa pa garantisa cu piscadonan por informa y haña solucion rapido na cualkier situacion relaciona cu e FADs.
E instalacion di e FADs ta demostra e compromiso di Gobierno di Aruba y e sector di pesca pa promove inovacion, sostenibilidad y crecemento economico. Pa mas informacion por tuma contacto cu Santa Rosa Aruba of Varadero Aruba.
CEO nobo di aeropuerto a yega Aruba y reuni cu minister
ORANJESTAD – Despues di un retraso chikito debi na problema di buelo (relaciona cu mal tempo na Europa), e CEO nobo di Aeropuerto, Johnny Andersen a yega Aruba porfin y a cuminsa traha. Minister di Turismo mr. Wendrick Cicilia responsabel pa aeropuerto, a tene un reunion oficial cune, como parti di e proceso di introduccion y alineacion strategico despues di su reciente nombracion. Minister Cicilia tabata compaña pa Tico Croes y Philippe La Reine, y miembronan di Hunta di Comisario di Aruba Airport Authority encabesa pa Marion Kan, hunto nan a forma parti di e reunion. Durante e reunion a trata topiconan clave relaciona cu maneho di aeropuerto, desaroyo di aeropuerto den futuro, conectividad aereo y importancia di aeropuerto como un pilar fundamental di turismo y economia di Aruba.
Dowers: Aruparking lo takel auto di esnan cu a surpasa ora di parkeer
ORANJESTAD – Autonan cu a pasa nan ora di parkeer paga, por haya nan mes mal sirbi door di haya nan auto getakeld, y cu tin cu cubri tur gasto di esaki. Minister encarga cu husticia, y bou di cual ta cay tambe Aruparking, Arthur Dowers, a duna un briefing cortico dialuna riba e situacion aki. Segun e mandatario, durante e ultimo 3 lunanan, a parti 375 multa pa esnan cu tabata parkeer robez tur caminda. Y a takel 150 auto cu tabata stroba trafico, creando un peliger.
Gobierno ta entrega ley ‘Langdurige Zorg Aruba’ pa nos grandinan
ORANJESTAD - Prome Minister Mike Eman durante e programa Noticiacla LIVE a comparti cu durante e celebracion di 25 aña di existencia di AZV, hunto cu Minister di Salubridad, Asunto Social, Cuido di Hende Grandi y di Adiccion, Mervin Wyatt-Ras, a anuncia un ley nobo. Ta trata di e Landsverordening Langdurige Zorg Aruba.
Gobierno ta introduci startersregeling pa stimula empresanan nobo
ORANJESTAD - Den cuadro di un strategia pa stimula empresanan nobo y diversificacion di Aruba su economia Minister di Finansa, Economia y Sector Primario Geoffrey Wever ta introduci oficialmente un “Startersregeling” pa companianan nobo, dirigi na elimina barrera fiscal pa empresanan nobo y crea un clima fiscal mas faborabel pa empresanan nobo.
Eman: Refineria na Aruba definitivamente ta keda cera
ORANJESTAD – E refineria na Aruba ta keda cera. Y ni cu e desaroyo nobo na Venezuela, esaki no ta cambia. Asina prome minister Mike Eman a bisa durante e programa Noticiacla LIVE na Tito Laclé. Laclé a puntra e mandatario si mirando e desaroyo nobo na Venezuela unda cu ta parce cu Merca ta den control di e petroleo, cu si esaki ta pone gobierno di Aruba pensa dos biaha riba e plan pa e refineria. E refineria a cera su portanan algun tempo atras, y Eman a sigura cu esey lo keda asina. Tabatin un periodo di gloria di e refineria, pero esaki awor a caba y definitivamente e refineria ta keda cera.
Dowers: Polis a señala cu situacion di trafico a bay for di man na Aruba
ORANJESTAD – “Polis a señala situacion di trafico (na Aruba) practicamente a bay for di man na pais Aruba”. Asina minister di husticia di Aruba Arthur Dowers a bisa diabierna mainta durante un reunion di Parlamento contestando pregunta di parlamentarionan. E reunion tabata a base di peticion di un parlamentario (John Hart di AVP) riba e tema di seguridad di trafico despues di un fin di siman tragico unda cu 3 persona den dos diferente accidente a perde nan bida cruelmente.
Follow NoticiaCla
