OM: A apela sentencia di tur 4 periodista den caso di portofoon ‘New York’

ORANJESTAD – Ministerio Publico a confirma diamars cu e ta apela tur e sentencianan den caso di e grupo di 4 periodista relaciona cu e caso NEW YORK. Asina e vocero di OM, Ann Angela a bisa Noticiacla. Manera ta conoci na December ultimo, huez a sentencia e cuater periodistanan na varios sentencia variando di castigo di prizon te na trabou comunitario pa nan actonan ilegal cometi. OM tabata pendiente pa wak si ta tuma e paso aki, esta di apela. Ta trata di e periodistanan Richard Lacle, Brian Koolman, Norben Giel y Nelson Cabral de Andrade (Speed). Den e caso aki huez a declara tur cuater liber di ta den un organisacion criminal, pasobra no tabatin suficiente prueba pa tal. Pero si nan ta culpable di a soborna un agente policial pa informacion. Cu e apelacion aki, e caso completo lo wordo trata di nobo den un corte di apelacion unda cu tres huez lo trata e caso e biaha aki. Noticiacla a compronde cu e periodistanan tambe lo a apela nan respectivo sentencia. Awor ta keda pendiente pa e caso aki bin dilanti y wak si ta bin cambio den e sentencianan. E caso di apelacion por tuma lugar e aña aki ainda pero ta mas sigur cu esaki lo tuma su tempo y cu mas sigur esaki lo por ta pa fin di e aña aki.