Awor ta Arends( Raiz) ta cuestiona Molina (MEP) riba integridad riba e situacion taxista

ORANJESTAD – Un siman despues cu parlamentario di partido MEP Alvin Molina a cuestiona minister di RAIZ (miembro di coalicion cu partido MEP) riba e asunto di taxista, acusando e minister di a tira Parlamento 'bou di bus', e minister encuestion mes a dicidi di reacciona. “Duespues di simannan cu diferente punto di bista a bin dilanti, nos a tuma nota di politico literalmente bisa cu “Integridad no ta e meta”.  E ora ey nos tin cu puntra nos mes, kico ta nan meta e ora como miembro di Parlamento?” ta loke e minister a cuminsa na bisa den un articulo cu su partido a publica como reaccion. 

RECORDA PARLAMENTARIO

Segun Arends, ta importante pa recorda algun parlamentario cu reunionnan di comision ta confidencial. Mester bisa cu, mientras cu e ta referi na ‘algun parlamentario’ esun cu e kier men primordialmente ta Molina cu ta esun cu a reacciona. Mas leu den e articulo Arends ta specifica e parlamentario en cuestion tambe. Segun Arends, e reunionnan aki ta esencial pa splica y hustifica decisionnan, manera pa garantisa oportunidad igual pa tur ciudadano cu ta desea bin na remarce pa un permiso di taxi.

REUNION PUBLICO 

Ursell Arends ta sigura cu den su funcion como minister di transporte a haci e peticion pa e reunion ta publico, pa asina e por duna no “solamente parlamento pero pueblo henter tur informacion, el que no debe no teme!” Segun Arends, tanto ecomo Fraccion Raiz ta boga pa un reunion publico unda transparencia y e berdad cruel di politica tradicional lo prevalece.

INFORMACION CLAVE

Durante e reunion, e minister ta sigui bisa, a comparti informacionnan clave riba e sistema di permiso pa taxi cu a wordo hereda, revelando con e sistema a wordo modifica y manipula pa haci patronahe politico posibel. A presenta pruebanan y documentonan pa mustra cu ta un situacion serio y cu e sistema actual ta totalmente comprometi.

MOLINA TA KEDA KETO DEN REUNION 

Loke ta notabel segun Arends, ta cu Parlamentario Molina no a haci ni un pregunta of comentario durante e reunion. “Un comportacion straño cual a pone luz riba e intencionnan di Parlamentario Molina ora a dicidi di no vocifera nada durante reunion di comision pero si pa informa media cu pa su persona “Integridad no ta e meta””.

INFORMACION CONFIDENCIAL

Segun Arends, den un reunion asina bo ta yega facil na informacion confidencial. E la pidi reunion (refiriendo na Molina:red) , e la haña reunion, e tabata presente, pero e no a participa. E la sinta y a scucha tur cos. “Si  bo conoce e sistema hudicial na Aruba ta facil pa bo por formula un idea con lew e investigacionnan ta, ken ta wordo investiga y bo por hasta conclui ta ken tur ta trahando riba e casonan. Esaki ta informacion valioso y delicado”, segun Arends a duna di conoce. “Despues cu Parlamentario Molina a sinta y ricibi informacion a haci e decision pa bisa den prensa cu “ora Integridad ta bo meta, lo bo mira cu cosnan lo bay fout.” Un declaracion sumamente preocupante pa un parlamentario bisa y para ariba” Arends ta bisa.

POSTURA DI MOLINA 

Tambe ta straño segun Arends, cu desde e prome dia di accion por a nota e postura di e politico Molina unda cu e la rapidamente tuma un postura masha defensivo y nervioso. “E la sali defende un sistema cu no ta brinda oportunidad igual, un sistema cu a wordo manipula pa decadas pa patronahe politico. Algo cu mayoria parlamentario a acepta cu ta berdad. Mas cuestionabel ta e inabilidad di compronde e urgencia pa drecha un sistema cu simplemente no ta corecto. Paso segun e, integridad no mester ta e prioridad”.

DEFENSA DI UN SISTEMA NO INTEGRO

Politiconan cu ta bin na defensa di un sistema cu no ta integro y absolutamente obstrui oportunidad igual, ta duna di conoce cu parlamento ta hopi mas lew di bon gobernacion cu nos a spera, Arends ta sigui bisa den e articulo di partido RAIZ. “Si e hecho cu e minister di transporte anterior a firma un avalanche di permiso un dia prome cu elecion, no ta indicativo di falta di integridad pa Parlamentario Molina, e ora nos tin cu conclui tambe cu e intencion di e politico no ta pa haci lo corecto pero simplemente pa tin acceso na informacion”.

TA CUESTIONA CON EX POLIS TA VOCIFERA SU MES

Informacionnan cu ta relevante na investigacionnan andando cual ta hacie mas straño ainda cu un ex polis lo vocifera su mes den publico den tal forma segun Arends.”Cuerpo policial ta propaganda nan balor y norma - integridad y siguridad! Pues, aki tin un descrepancia entre tanto un ex-polis/ parlamentario, cu locual pueblo y su institucionnan ta spera di dj’e. Un persona cu a sinta scucha tur informacion confidencial sin niun contribucion na e reunion pero si a dicidi di sali bai papia cu prensa y boga pa Gobernantenan no pone integridad como meta”.

INTERES PARTIDARIO OF PERSONAL

Segun e mandatario, ta keda na cada politico con nan ta presta nan mes pa interes partidario of den e caso aki kisas personal. “Pero un cos ta claro; Ora Integridad no ta e meta mas, nos lo a perde di bista loke ta nifica pa sirbi pueblo di berdad. E futuro di gobernacion ta depende di lidernan cu ta pone integridad riba tur otro cos. Cualkier otro cos ta un traicion di e confiansa cu a wordo poni den nan y pa RAIZ integridad no ta negociabel”. Arends ta finalisa cu e pregunta aki:” E pregunta cardinal ta: Aruba ta cla pa kibra cu sistemanan tradicional cu ta bay contra bo derecho y contra oportunidad igual, si of no?”.