Molina (MEP): Minister Arends inhustamente ta tira Parlamento bou di bus

ORANJESTAD – Segun parlamentario di partido MEP Alvin Molina, minister Ursell Arends ta tira Parlamento bou di bus ora cu cos bira cayente. E parlamentario diamars a relata riba e reunion entre taxistanan y un comision di Parlamento. Segun Molina, e taxistanan tin un trabou importante, esta pa transporta nos bishitantenan pa nan destinacion na un manera safe, na un tarifa rasonabel, dunando un servicio confiabel y amabel. Cu e meta pa nos turistanan sigui bishita nos dushi isla. “Taxista tambe tin cu tene nan mes na regla, e reglanan di trafico y contribui na caha di pueblo. E regla cu ta wordo trata door di gobierno awo, ta e cantidad di pasahero cu nan mag di transporta y e proceso pa traspaso di permiso (vergunning)” Molina ta sigui bisa.

REUNION

“Den Comision di Transporte nos a reuni cu e representantenan di taxista. Minister a basha awa den e proceso pa haci cambio den maneho pa cu taxi. E taxistanan no ta sinti nan mes envolvi, no a wordo scucha y ni tuma na serio pa cu nan preocupacionnan” Molina a sigui bisa. Segun e Parlamentario, tin varios problema cu un taxista ta encontra den nan trabou diario, cu minister no tin atencion pa nan, pero si ta tira problema extra den nan scochi. E problemanan real cu nan ta topa cu ne ta, segun Molina,  entre otro transporte ilegal, stagnacion den trafico door di problema cu parkeo, peliger door di step electronico y pensioen pa taxista.

MINISTER TA TIRA PARLAMENTO BOU BUS

“ Pa colmo, ora cos a bira cayente, “manure hit the fan“, minister inhustamente ta tira Parlamento di Aruba bou di bus, bisando cu ta parlamento ta su hefe y a dune “opdracht” pa haci esaki” Molina a sigui bisa. Loke cu minister a bisa no ta berdad,segun Molina, ya cu segun e, parlamento solamente a pidie pa investiga e posibilidad pa introduci un taximeter y haci esaki hunto cu tur stakeholder. “Mare minister haci loke Parlamento ta pidie pa haci, por ehempel pa cu agricultura y sushedad na Aruba” Molina ta finalisa bisando. E ta sigura cu e parti ey, Parlamento y Fraccion di e Mep ta den proceso con pa atende cu e caso aki.