Noticia di Noticiacla confirma: Soul Beach Music Fest no ta bolbe Aruba!

LOS ANGELES – ‘Aruba a dicidi pa no extende nos partnership’. Cu e frase aki, organizadornan di Soul Beach Music Festival despues di 24 aña ta yega na su final. Noticiacla tabata e prome pa toca e tema aki un luna pasa, ora cu a publica un carta di e organizador Mark Adkins na ATA, puntrando kico e motibo ta pa cual no tin comunicacion mas. E tempo ey, a compronde di ATA cu tin un otro intencion pa cu festivalnan na Aruba y cu esaki lo a keda informa na e organizadornan tambe. Sinembargo segun Adkins, ATA no tabata comunica cu nan kico e cambio ey tabata. Pues nan a keda den scuridad segun Adkins. E ora ey tabata conoci caba cu e festival no ta bolbe Aruba. Pero awor e confirmacion a yega, sin cu tin un declaracion concreto riba e motibo. 

SOCIAL MEDIA

E organisacion a solamente pone un mensahe riba nan website y Instagram cu un gradicimento pa e sosten na e fanaticonan, y cu e mensahe duro cu e festival no ta sigui. 

LUGAR NOBO

E festival lo sigui, solamente otro caminda, cu no ta Aruba. “Soul Beach lo muda pa un destinacion nobo y exitante pa 2025” e mensahe ta bisa. Intento pa comunica e biaha aki cu Adkins, (ainda) no tabata exitoso te ora cu nos a publica e articulo aki.