Organizadornan di SBMF kier claridad pakico ATA no ta sigui mas cu e festival

ORANJESTAD – Despues di a disfruta di e di 20 edicion di Soul Beach Music Festival luna pasa, ta resulta awor cu esaki tabata mesora tambe e ultimo edicion ya cu no otro aña no ta continua cu e festival aki. Y no ta debi cu e organizadornan no kier, sino cu di parti di Aruba (lesa ATA:RED), nan kier un cambio. Den un carta (cu a cay den man di Noticiacla:red) cu e organizadornan di e festival a manda diabierna ultimo na e CEO Di ATA, Ronella Croes, por lesa e.o. cu e terminacion di e concierto, ta uno ‘inespera’, y cu a laga e organizadornan ‘profundamente preocupa y decepciona’. 

FALTA DI INFORMACION Y COMUNICACION

For di e carta, por compronde cu diripiente,e organizadornan a wordo bisa cu Aruba no kier e concierto actual mas, sino kier algo otro. E problema segun e organizadornan ta cu ATA no ta ‘duidelijk’ kico e ‘otro’ ta y no ta comunicando cu nan. Noticiacla cu a tende di e rumor aki anteriormente, a comunica cu e CEO di ATA, Ronella Croes,  prome cu e carta a bira conoci. Croes a bisa den un reaccion cortico cu lo atende esaki na un otro oportunidad, pues cu e no tin prioridad aworaki. 

E NOTICIAA resulta (segun e carta), cu un luna prome cu e evento tuma lugar, e organizadornan a haya un carta di ATA, (21 di maart 2024), bisando cu e concierto no ta continua, pero no ta duna un hustificacion cla pakico e ‘decision abrupto aki’, segun e organizador ta bisa. Y despues no a tende nada mas di e representantenan di turismo cu ta responsabel pa e patrocinio principal di e evento, esta ATA. 

NO TIN COMUNICACION

For di e carta tambe di e organizador, ta resulta cu pa 4 luna largo e organizadornan a haci iniciativa pa cuminsa combersacionan riba e tema, cu e meta pa aliña e strategianan cambiante di ATA y pa asina por logra yega na e ‘meta nobo’ di ATA. “Y pesey ta lamentable cu no obstante nos intento proactivo y boluntad di evoluciona, nos no a haya e oportunidad pa un dialogo directo y habri”. E ora por compronde tambe cu berdad ATA lo tabata papia cu e organizadornan basta tempo, pero cu e decision mes di para e festival, a bin algun siman atras numa, den e carta menciona di maart. 

EVENTO DIFERENTE

For di e carta actual di diabierna, por compronde cu ATA lo a informa e organizadornan cu nan kier ‘un tipo di evento diferente, estilo boutique, bienestar y luhoso,’ y lo a informa e organizadornan di esaki tambe. Ora cu e organizadornan a manda nan proposicion pa algo ‘otro’ , nan a bin tende cu ATA kier ‘mas informacion’, cu nan (e organizadornan) ta dispuesto pa haci, pero cu nan kier sa prome unda nan ta para, y si enberdad tin un oportunidad pa continua cu e colaboracion.

CONSECUENCIA 

E organizadornan ta splica tambe den e carta cu e paro diripiente di e evento, lo tin consecuencia economico significante pa Aruba, specialmente, mirando cu awor e inventario di camber ta aumentando y cu mester mas turista. Nan ta cuestiona seriamente con por recupera e perdida di entrada aki cu e festival ta genera den un tempo cortico, usando solamente mercadonan specifico manera cu ATA lo kier. Aki nan ta referi cu a tuma tempo pa ‘build up’ e mercado di Soul Beach Festival y cu awor e ta algo grandi cu ta genera miyones pa e isla tur aña. “Sin un strategia cuidadosamente traha, e repercussion por ta severo” e organizadornan ta sigui bisa.  

SCONDE

Loke por a sinti den e carta, for di bista di e organizadornan, ta cu ATA no ta dunando cara na e organizadornan, y ta lagando nan den scuridad y tin otro intento pero no ta compartiendo esaki cu e organizadornan. Esaki despues di un relacion di 19 aña, cu aworaki diripiente, ta termina den un forma abrupto. Noticiacla ta keda pendiente pa e reaccionan di entre otro ATA y tambe minister di Turismo, cu e portal aki a pidi pa un reaccion tambe pero te na momento di e publicacion aki, no a haya un contesta ainda. Pa e carta mes di e organizadornan, click AKI.