Ultimatum pa dicidi riba suma cu radionan mester paga DUCAPRO tur luna, a vence sin resultado

ORANJESTAD – E asosacion di radio na Aruba (Aruba Broadcasting Association-ABA) y e fundacion DUCAPRO (registro di derecho di artista y musica) no a haya otro ainda riba e suma cu radionan tin cu paga pa por tin derecho pa toca cierto musica na nan radio. Por lo menos, den forma inoficial ya cu ningun di dos partido ‘oficialmente’ a duna un reaccion. Conforme un caso sumario un luna pasa, huez a ‘suspende’ e caso y a duna partidonan te cu 24 di April (ayera) pa yega na otro riba e suma. Di otro forma, lo mester continua cu e caso y eventualmente dicta un sentencia, cu ta traduci na un suma stipula pa corte cu radionan mester bay paga DUCAPRO pa toca cierto cancionan na nan respectivo emisora.

MESTER PAGA

Durante e bay bin den corte, na februari ultimo, a keda estableci finalmente cu (incluso pensamento di huez) e radionan tin cu paga pa e derecho pa toca cierto musica na nan emisora. E asunto a keda, cuanto e suma lo mester tabata. Nada mas. Y ora cu huez e tempo ey a sugeri un suma, esaki a keda rechasa pa DUCAPRO, pa cual e ora e huez a sugeri pa partidonan sinta na mesa y yega na un suma mutuo. A duna 2 luna di tempo pa esaki sosode. Y e tempo ey a vence diaranson ultimo. 

COMENTARIO

Oficialmente, niun di e dos partidonan no a vocifera nan comentario riba esaki y via corte tampoco. Noticiacla a haci un intento pa haya reaccion di ambos partido, pero sin exito. Sinembargo den e matutino DIARIO diahuebs mainta a sali un publicacion riba e tema cu ta referi na un di e partidonan cu lo a comenta algo cu partidonan no a haya otro y cu por nifica cu partidonan tin cu sigui cu e caso, cu mas sigur un sentencia di huez.