Peticion nobo pa permiso parke molina Urirama ta cla

ORANJESTAD – E peticion nobo pa un asina yama ‘hindervergunning’ ta riba mesa di minister Arthur Dowers. Por lo menos asina e abogado di gobierno, Johan Sjiem Fat a confirma na e vespertino Amigoe diaranson. Ta trata di un permiso nobo pa e molinanan ‘nobo’ di 3.3 megawatt. Si tur cos cana bon segun e abogado, e parke di molina ta carga un tardansa di por lo menos 9 luna mas. Pues tin tur intencion di continua cu e proyecto.

PROCESO

Tur esaki ta saliendo for di punto di bista cu e minister encarga, lo otorga e permiso. Tin un proceso cu tin cu cana pa e permiso, cu ta entre otro, su publicacion den por lo menos un corant. Riba e aviso ey, esnan interesa por reacciona dentro di un luna. Despues e mandatario tin cu tuma su decision. Unabes cu e mandatario tuma su decision, ciudadanonan cu ta sinti nan mes afecta, por bringa esaki den un corte di LAR. Pero e decision di minister mes ta dura 2 pa 3 luna, sigui pues pa e posibel caso y su apelacion.

SENTENCIA

Tabata dialuna cu huez a dicta sentencia den e caso. E sentencia basicamente a bisa cu, pa e compania Windpark Urirama NV bin na remarke pa un ‘’hinderverordening’ nobo cu ta cumpli cu e tipo di molina 'nobo, e mester cuminsa e proceso di nobo di pidi. E no por haya esaki cambia simplemente via un sentencia di hues. Y como cu e compania no por (mas) y no kier haci uso di su permiso otorga (loke a keda estableci den Corte segun huez) , e no por construi un parke di molina mas (por lo pronto). Y sin un parke di molina, no por papia mas di un influencia negativo pa e habitantenan den besindario di Urirama/Altovista. Cu esey, ambos partido a wordo rechasa den nan demanda.

SENTENCIA

Den e sentencia di e caso Urirama, obteni pa NoticiaCla.com, huez ta mustra cu e ta cita hunto cu gobierno, den e sentido cu pa e compania Windpark Urirama por haci adaptacion na e permiso cu e la haya pa bin cu un parke di molina, e mester cuminsa e proceso di nobo. A resulta cu e molinanan pa cual a pidi (y haya permiso), cu ta produci 3 mw di coriente, no ta wordo fabrica mas. A haya molinanan cu awor lo produci 3.3 mw. Y e compania kier a haci e cambio pa medio di un ‘keho’, pa asina huez otorga esaki ya cu gobierno a nengue di haci tal. Corte a cita cu gobierno den e caso aki y a mustra cu enberdad, e compania mester cuminsa e proceso di nobo.

IMPLICACION

Esnan cu ta bringa e caso, como tal, no tin di precupa mas pasobra sin e permiso, e compania no por traha un parke di molina mas. Y sin un parke di molina, no tin e molesternan presente pa cual e grupo ta protestando. Como tal tanto e compania como e gruponan cu a cuminsa e caso, ta wordo declara no admisible.

GRUPO GANA?

Den e caso aki, por interpreta cu e grupo cu a bringa e binimento di e parke, ta sali gana den sentido cu nan a logra cu (por lo pronto) no tin un construccion di e parke. Pa e compania e ta nifica cu si e kier construi e parke ainda, e tin cu cuminsa e proceso full di nobo, prome cu e por bin na remarke pa por haya un permiso. E pregunta ta keda na e compania, si e ta bay haci esey. NoticiaCla.com no a haya e reaccion ainda di e compania. Por lesa e sentencia aki.

REACCION AFFECTED RESIDENTS URIRAMA

E grupo di residente cu ta yama nan mes  ARU, Affected Residents Urirama ya caba a avisa cu si mester un biaha mas, nan lo bringa un biaha mas y bringa te ora cu nan sa cu no por mas. E grupo a haci un apelacion diamars atardi na gobernantenan. Den nan prome salida despues di e veredicto dialuna riba e parke di Molina, e vocero di e grupo, Lissette Malmberg a pidi pa sinta cu gobierno pa yega na un solucion cu berdaderamente ta sostenibel. “Nos no kier solamente bisa cu nos ta opone esaki (binimento di un parke di molina)”, vocero di e grupo Lissette Malmberg a bisa ayera. Un dia despues cu e veredicto a cay den e caso di parke Urirama, e grupo a duna su comentario riba e veredicto y su efecto.

CAMINDA LEGAL

Segun Malmberg, e proyecto di Urirama tin hopi caminda legal pa cana ainda prome cu e wordo realisa. E grupo ta trahando riba esaki for di 2011, cu varios protesta y tambe casonan den corte. A mustra cu e proyectonan aki (di molina di biento) ta hayando resistencia rond di mundo, no solamente pa motibo di motibonan di salud sino tambe financiero. Como tal ARU kier sinta na mesa y ta mantene su mes altanto di posibel otro solucionnan.

CUATER CRITERIA FUNDAMENTAL

“Cualquier solucion berdaderamente sostenibel mester ta basa riba por lo menos riba e 4 criterionan fundamental, menciona. Entre nan, tin cu e solucion no por causa daño na salud di ser humano, no por causa daño na nos medio ambiente, ta financieramente responsabel, y ta pone e beneficio na nivel di e consumidor di pais Aruba enves di un grupo chikito di inversionista.

PAUSA TEMPORAL

E hecho cu, despues di e veredicto aki, ta cla cu lo tin un retraso considerabel, mester fungi pa por sinta na mesa y bin na un otro solucion. Malmberg ta papia di casi 900 hogar, cu ta traduci den 2000 hende directamente afecta den e radius di 2 km for di e posibel futuro molinanan, cu mester por wordo scucha y ‘no por simplemente wordo nenga of neglisha’ unda cu tin combersacionnan serio y tur hende ta habri.

NO TIN SOLUCION AINDA

Mientras cu ta pidi pa un tempo pa negosha, no tin si un solucion directo cla pa ofrece. “Nos ta haciendo research riba diferente alternativa. Nos no ta cla pa nos duna un contesta clave riba esaki” Malmberg a admiti. E ta mira cu pueblo kier yuda pensa. Lesa mas di e caso mes y su veredicto aki.