Huez awe a revoca hindervergunning na ex Dump, y no mag cende incinerator

ORANJESTAD – Huez diaranson (awe) den corte di LAR a revoca e hindervergunning di Parkietenbos valido pa opera e asina yama incinerator na e ex Dump. Sin e permiso aki, e incinerator no por traha y ta duna e activista y hurista mr Anouk Balentina razon den un caso cu e ta bin ta bringa foi 2020. Na 2020 tabatin un caso caba y un sentencia na su fabor unda cu huez den e caso ey tambe a para e hindervergunning temporalmente. Den un sentencia extenso awor di 16 pagina, e huez ta argumenta entre otro e forma con ministernan a anda cu e caso, con a tuma decision cu no tabata corecto, no competente conforme e cartera di minister y cu no a tene cuenta cu un cantidad di cos. Huez a bati riba dede di dos minister, esta di husticia y tambe di medio ambiente, pa nan forma di actua. Cu e sentencia extenso aki, no ta keda gobierno nada otro di bay bek na opera den e forma anterior esta di kima e desperdicionan riba e tereno mes envez di usa e incinerator. Ademas a palabra cu mester busca un incinerator mucho mas grandi pa cual mester bolbe pidi un permiso (hindervergunning) y e biaha aki di e forma corecto. E peticion di Balentina pa hala e incinerator otro caminda, huez a bisa di no por dicidi y lo no dicidi ariba, pasobra esaki ta un decision politico. Por lesa e sentencia completo AKI.