Abogado Wever: Benta e muraya di desigualdad den e paisnan (Aruba y Corsou) abou!

DEN HAAG -  “Benta e muraya di desigualdad den e paisnan (Aruba y Corsou:red) abou! Asina abogado Wever representando Fundacion Orguyo a finalisa su defensa den Corte di Casacion diabierna na Den Haag den e caso di matrimonio di mesun sexo. Segun e abogado, e grupo di persona perteneciendo na e grupo di persona di mesun sexo, tin cu bringa hopi discriminacion caba den comunidad. “Un grupo asina lo mester tin gobierno na su banda cu den todo caso. Pareha di mesun sexo ta igual pa ley y no ta wordo descrimina” Wever a sigui bisa. Lamentablemente lo contrario na Aruba y Corsou ta e realidad, e abogado ta sigui bisa. “Pareha di mesun sexo manera pareha Marquez y Angel na Hulanda ta wordo discrimina pasobra nan no por casa cu otro. Esaki ta nifica cu no solamente nan no por corona nan amor cu un casamento, pero ta nifica tambe cu hopi consecuencia huridico di un matrimonio ta wordo kita di nan” e abogado a sigui bisa, usando un di e parehanan den corte como ehempel. 

HOF A RECONOCE DISCRIMINA 

Hof den su veredicto (aña pasa December ora cu a habri e matrimonio di mesun sexo pa Aruba y Corsou: red) a reconoce e discriminacion cu parehanan di mesun sexo ta experencia segun e abogado, y a mara esaki na consecuencia huridico.” Hof no a constata solamente cu tin tratamento desigual y illegal, pero tambe a mara e unico consecuencia husto na esaki door di habri e matrimonio (di pareha di mesun sexo:red)” Wever a sigui bisa. E pensamento principal di e casacion, ta cu huez a bay sinta riba stoel di gobierno. “Nos lo demonstra cu esaki no ta e caso y pakico e apertura di matrimonio (di mesun sexo) ta necesario pa tin un proteccion legal efectivo. Esaki ta los di e observacion Hulandes. Pero e apelacion si ta mishi cu esaki” segun e abogado. Por scucha e defensa completo di e abogado AKI.